Almatyda ishinde bala bar kólikke tas jaýdyrǵandar izdestirilýde
ALMATY. 2 qazan. QazAqparat - Almatyda avtokólik ishinde qalǵan bala zardap shekti. Polıtseıler turaqqa qoıylǵan mashınaǵa tas laqtyrǵan eki er adamdy izdestirip jatyr.
Mashınanyń ishinde 10 jasar qyz bala otyrǵan, dep habarlady qalanyń ІІD baspasóz qyzmetinen.
Aǵymdaǵy jyldyń 30 qyrkúıeginde keshki segizder shamasynda belgisiz eki er adam turaqta turǵan kólikke tas jaýdyrǵan. Qyzdyń anasy jaqyn mańda ornalasqan dúkenge kirgen. Avtokólik ıesiniń sózine qaraǵanda, ol nebári úsh mınýt qana ornynda bolmaǵan. Mashınanyń aldyńǵy áınegi men farlary kúl-parsha bolǵan.
Qylmystyq is qozǵaldy. Qazir beıneregıstratorǵa tirkelgen jazba boıynsha plenkaǵa túsip qalǵan jigittiń kim ekenin jáne qaıda turatynyn anyqtaý úshin polıtseıler jedel-izdeý sharalaryn júrgizip jatyr. Olardyń basqa quqyqbuzýshylyqtarǵa qatysy bar-joqtyǵy tekserilýde.
Almaty ІІD osy adam jaıly qandaı da bir aqparat biletin adamdar bolsa, 102 nómirine habarlasýdy suraıdy.
