Almatyda iri sýpermarket órtendi
ALMATY. QazAqparat - Túrksib aýdanynda ornalasqan sýpermarket otqa orandy, dep habarlaıdy QazAqparat tilshisi.
Órttiń vıdeosy áleýmettik jelide tarap jatyr. Almaty qalalyq tótenshe jaǵdaılar departamentiniń málimetinshe, búgin saǵat 10:32 shamasynda órt sóndirý bólimsheleri Túrksib aýdanyna qarasty Súıinbaı kóshesi, 419a mekenjaıy boıynsha órt týraly habarlamaǵa joǵary dárejedegi shaqyrtýmen shyqty.
«Órt sóndirýshiler oqıǵa ornyna 7 mınýtta jetti. Olar eki qabatty «Huseinoff» sýpermarketiniń ekinshi qabaty men shatyry ashyq jalynmen janyp jatqanyn anyqtady. Gaz-tútinnen qorǵaý qyzmetiniń býyndary dereý adamdardyń bar-joǵyna barlaý júrgizip, órt oqpandary engizildi. Oqıǵa ornynda shtab ornatylyp, 50-den astam qyzmetker jáne 15 tehnıka, onyń ishinde eki AL-32 metrlik órt avtosatysy jumyldyryldy»
, - dep habarlady vedomstvadan.
Qabyldanǵan shuǵyl sharanyń arqasynda órt tolyq sóndirildi.
Qaza bolǵandar men jaralanǵandar joq. Órttiń shyǵý sebebi anyqtalyp jatyr.
