Almatyda iri saýda ortalyqtary mańyndaǵy jabaıy saýdamen kúres áli jalǵasýda

Sońǵy jyldary qala ákimdigi iri saýda oryndary mańynda zańsyz saýdamen aınalysýshylarmen kúresýdi qolǵa bekem alǵan. Sonyń nátıjesinde búgingi júrgizilgen reıd barysynda zańsyz saýdamen aınalysyp júrgen birde-bir adam kórinbedi.

Medeý aýdany ákiminiń orynbasary Berik Mustafın Kókbazar qaladaǵy eń iri saýda ortalyǵynyń biri bolyp tabylatyndyǵyn, 17 jyldaı bul bazar mańynda zańsyz saýdagerler jumys istep, ıaǵnı jabaıy saýda ornyna aınaldyryp jibergendigin aıtyp ótti. «Bıylǵy jańa jyldan beri onymen kúresý úshin kóptegen sharalar qolǵa alynyp, tereń taldaý júrgizildi jáne jabaıy saýdanyń taraýyna ákeletin birneshe sebepter de anyqtaldy»,-deıdi ákim orynbasary.

Júrgizilgen sharalar barysynda bazar mańynan júretin avtobýstar, ıaǵnı Pýshkın kóshesimen júrip Raıymbek kóshesine shyǵatyn qoǵamdyq kólikter qatary azaıǵan. Bul avtobýstardyń basym bóligi qala mańyndaǵy eldi-mekenderge adam tasıtyn kólikter bolǵandyqtan olardyń turaqtaıtyn oryndary «Saıahat» avtobeketi eken. «Biz qalalyq qoǵamdyq kólikterine tekserý jumystaryn júrgizip, qalaǵa qyzmet etpeıtin kólikterdi «Saıahat» avtobeketine turaqtaýdy buıyrdyq. Sonymen qatar bazar mańynan júretin kólikterdiń sanyn azaıtyp, olardy jaqyn mańdaǵy kóshelerden ótkizýdi jón kórdik», -deıdi B.Mustafın.

Buǵan deıin Pýshkın kóshesi boıyndaǵy aıaldamadan saǵatyna 140 avtobýs júrip ótip otyrǵan eken. Bul adamdardyń osy aıaldama mańyna kóp shoǵyrlanýyna sebepshi bolyp, jabaıy saýdanyń órshýine ákep otyrǵan.

B.Mustafın sonymen qatar jabaıy saýdamen aınalysyp kelgen adamdarǵa ákimshilik kodekstiń birneshe baby boıynsha eshqandaı shara qoldana almadyq degendi alǵa tartady. Alaıda bazar mańyn abattandyryp, kóptegen taldar egip, qorshaýlar salǵan. Aldaǵy ýaqytta Medeý aýdanynyń ІІB men birigip kúndelikti reıdter júrgizý qarastyrylýda eken.

Ákim orynbasarynyń aıtýynsha, osy bazar mańynda buǵan deıin 6 myńǵa jýyq saýdager zańsyz jumys istep kelgen kórinedi. «Bul adamdardyń óte úlken bóligi, olardyń árqaısysynyń óz problemalary, otbasylyq áleýmettik jaǵdaıy bolǵan. Biz olardyń máselesinen bas tarta almadyq. Sondyqtan olardyń árqaısysymen jeke kezdesip, máselelerin sheshýge tyrystyq»,-deıdi ol. Nátıjesinde olardyń 95 paıyzy qala turǵyndary emestigi anyqtalyp, tipten keıbiri ózge eldiń azamattary bolyp shyqqan. Ózge eldiń azamattary úshin Qazaqstanda zańdy jumys isteý máseleleri qaralsa, el azamattary úshin olardy ózge jumysqa ornalastyrý sharalary júrgizilip, saýda jasaýǵa basqa oryndar taýyp berilgen. Máselen, jumys isteýge qulshynys bildirgen 2800-deı adam jumysqa ornalastyrylypty.