Almatyda iri saýda ortalyǵy órtendi
ALMATY. QazAqparat – Almatydaǵy «Samal» shaǵynaýdanynda ornalasqan iri saýda ortalyǵynan órt shyqty, dep habarlaıdy QazAqpara tilshisi.
Áleýmettik jelide «Life town» saýda ortalyǵyna japsarlas ornalasqan býrger jáne dóner daıyndaıtyn dúńgirshekten órt shyqqany týraly habar tarady. Jalyn saýda ortalyǵyn sharpyǵan.
Almaty qalalyq Tótenshe jaǵdaılar departamentiniń málimetinshe, órt 6 mamyr kúni tańǵy 5:45 shamasynda shyqqan.
«Dóner satatyn dúńgirshekten shyqqan órt saýda ortalyǵynyń ekinshi qabatyna ulasqan. Qyzyl jalyn 150 sharshy metr jerdi sharpydy. Alǵashqy bólimsheler shaqyrý ornyna saǵat 05:50-de (5 mınýtta) keldi. Órt 06:16-da aýyzdyqtalyp, 06:30-da tolyq sóndirildi. Qaza bolǵandar men zardap shekkender joq. Órttiń shyǵý sebebi anyqtalyp jatyr», - dep habarlady departamenten.
Órtti sóndirýge 13 birlik tehnıka men jeke quramnan 50 adam jumyldyryldy.
