Almatyda iri saýda kompanııasynyń ekspedıtorlary qaraqshylardyń tonaýyna jol bermedi
ALMATY. 4 jeltoqsan. QazAqparat - Almatyda iri saýda kompanııasynyń ekspedıtorlaryna qaraqshylyq shabýyl jasaýǵa áreket etkender ustaldy,
dep habarlady qalanyń ІІD baspasóz qyzmetinen.
Qarasha aıynyń sońynda kompanııanyń eki ekspedıtory azyq-túlik dúkenderiniń birine halyq tutynatyn taýardy ákelip, túsirip jatqan kezde shabýyl jasalǵan. «Taýardy túsirip jatqan kezde olarǵa belgisiz eki er adam jetip kelgen. Bireýiniń qolynda tapanshasy bolǵan, qylmyskerler olardan qolda bar 800 myń teńgeden artyq aqshany berýdi talap etken. Biraq ekspedıtorlar buzaqylarǵa qarsylyq kórsetken. Qaraqshylardyń biriniń qolynan qarýy túsip qalǵan. Artynsha qalǵandary oqıǵa ornynan dereý izderin jasyrǵan», - dep atap ótti Almaty ІІD krımınaldyq polıtsııa basqarmasynyń qaraqshylyq shabýyl jasaý men tonaý qylmysyn ashý boıynsha bóliminiń basshysy, maıor Danııar Kúshálıev.
«Oqıǵa ornyn qaraý kezinde «RG-89» revolveri tabyldy. Ol sot-ballıstıkalyq saraptamaǵa jiberildi. Osy iske qatysty ekinshi adam da anyqtaldy. Ol jaqyn kúnderi ustalady. Tergeý aıaqtalǵannan keıin jeńil paıda tabýdy kózdegender sot aldynda jaýap beredi», - dep málimdedi maıor Kúshálıev.
