Almatyda iri órtte avtokólik janyp ketti
ALMATY. QazAqparat - Almatyda Raıymbek kóshesi, 275-úı meken jaıynda aýlada ornalasqan qora-qopsylar órtendi.
Almaty qalalyq TJD-nyń resmı ókili Sandýǵash Baımuhambetovanyń aıtýynsha, órt týraly habar saǵat 18.58-de túsken, dep habarlaıdy QazAqparat.
«Órt sóndirýshilerdiń alǵashqy toby kólik keptelisterine qaramastan, oqıǵa ornyna 12 mınýttan keıin jetti. Ol ýaqytta tórt úıdiń aýlasynda ornalasqan qora-qopsylar laýlap jatty. Jalyn saldarynan HONDA CRV markaly kólik tolyǵymen janyp ketti. Joldyń tar bolýy jáne sharýashylyq qurylystardyń bir-birine tyǵyz ornalasýy órtti aýyzdyqtaý jumystaryna qıyndyq keltirdi», - dep habarlady ol.
Tilsiz jaý 19.23-te sóndirilip, 19.39-da tolyǵymen aýyzdyqtaldy. Jalyn 200 sharshy metr aýmaqty sharpydy. Zardap shekkender men qurban bolǵandar joq.
