Almatyda iri kompanııa tórt jyl boıy salyqty tolyq tólemeı, 8 mlrd teńge «únemdegen»

ASTANA. QazAqparat - Prokýrorlar memleketke 8 mlrd teńgeniń salyǵyn qaıtardy, dep habarlaıdy QazAqparat Bas prokýratýranyń baspasóz qyzmetine silteme jasap.

Almaty qalasynyń prokýratýrasy taldaý barysynda «KAZ Minerals Aktogay» JShS-niń salyqty azaıtý faktisin anyqtady.

Atalǵan kompanııanyń jyl saıyn KAZ Minerals Aktogay Finance Limited holdıng kompanııasyna dıvıdend tólep kelgeni belgili boldy.

Salyq zańnamasyna sáıkes qun ósiminen túsken tabystar, dıvıdend, syıaqylar, roıaltı tólem kózinen 15% mólsherlemesi boıynsha salyq salýǵa jatady.

Alaıda, salyq eseptiligin tekserý kezinde JShS jyl saıyn 2018-2022 jyldar aralyǵynda talap etiletin 15% ornyna 10% boıynsha salyq ustap, rezıdent emes retinde syıaqy tólegenin kórsetti.

Prokýratýranyń talaby boıynsha salyq organy JShS qyzmetinde korporatıvtik tabys salyǵyn esepteý men tóleýdiń durys-burystyǵyn tekserdi.

Atalǵan faktiler rastaldy, sondyqtan 8,2 mlrd teńge kóleminde qosymsha salyq esepteldi.

Salyq tóleýshi kórsetilgen somany memleket kirisine tolyq kólemde tóledi. Memleket múddesi qorǵaldy.