Almatyda iri kólemdegi esirtki tárkilendi
ALMATY. Shildeniń 26-sy. QazAqparat /Erbol Turymbetov/ - Keshe Almaty qalalyq polıtsııa qyzmetkerleri Taraz qalasynyń 44 jasar turǵynynan 51 keli 430 gramm marıhýana tárkiledi.
Esirtki tasymaldaýshy taýardy Almatyǵa avtobýspen ákelgen. Ol taýardy 3 sómkege salyp, kóliktiń júksalǵyshyna qoıǵan.
«Bizdiń qyzmetkerler bul azamat jóninde aldyn ala bildi. Ol ákelgen esirtkisin kóterme saýdamen satpaq bolǵan, tipti ózine tutynýshyny da taýyp úlgergen», deıdi Almaty qalalyq ІІD-niń esirtki bıznesimen kúres basqarmasynyń bastyǵy, polıtsııa maıory Denıs Loskýtov.
Qylmyskerdi quryqtaý operatsııasy halyqaralyq «Saıran» avtovokzalynyń aýmaǵynda júrgizildi. Eki avtobýs júrgizýshiniń kýálik etýinen keıin, ustalǵan azamat óziniń qylmysyn moıyndady. Sonymen qatar, ol qylmysty basqa bireýdiń ótinishimen oryndaǵanyn, óziniń bul iste tek qana tasymaldaýshy ǵana ekenin aıtty.
«Ustalǵan adam buryn da birneshe ret esirtki saqtaýmen jáne taratýmen qylmystyq jaýapkershilikke tartylǵan. Ol ózi ósimdikterdi Shý qalasynda jınaıdy, sosyn ony ár jerde satady», deıdi D. Loskýtov.
