Almatyda iri kólemde geroın alyp ótpek bolǵan qyrǵyz azamaty ustaldy
ALMATY. 8 qyrkúıek. QazAqparat /Názıra Eleýhan/ - «Almaty Halyqaralyq áýejaıynyń» ushyp kelý zalyndaǵy «Jetisý» keden beketinde keden qyzmetkerleriniń tekserýi barysynda esirtki zatyn alyp ótpek bolǵan Qyrǵyz Respýblıkasynyń azamaty ustaldy.
Bul týraly búgin Almatyda ótken arnaıy baspasóz máslıhatynda Almaty qalasy jáne Almaty oblysy boıynsha kedendik baqylaý departamentiniń baspasóz qyzmetiniń basshysy Erlan Qalymǵazın málim etti.
«Medıtsınalyq tekserý kezinde, ustalǵannyń týra isheginde ampýlada ashyq tústi untaq zattary bar tórt polıetılen paketi tabylyp, alyndy. Sarapshylardyń qorytyndysy boıynsha, alynǵan zat esirtkilik zat - geroın bolyp shyqty. Onyń jalpy salmaǵy 95,34 gramdy quraıdy. Qazirgi ýaqytta K esimdi azamatqa qatysty QR QK 259 babynyń 3 bóliminiń «v» tarmaǵy boıynsha qylmystyq is qozǵaldy»,-dedi E.Qalymǵazın.
Onyń aıtýynsha, qylmysker 30 tamyz kúni ustalǵan.
