Almatyda iri kólemde esirtki tárkilendi
ALMATY. 3 tamyz. QazAqparat /Ádilet Musahaev/ - Almaty qalasy ІІD baspasóz ortalyǵynyń málimetinshe, 55-jastaǵy qala turǵyny Shý óńirinen ákelingen 100 keliden asatyn marıhýanany Almaty qalasynyń «Aqbulaq» yqsham aýdanyndaǵy bos alańqaıǵa jasyryp qoıyp, saýdaǵa salatyn yńǵaıly sátti kútip jatqan.
«Bizge kelip túsken jedel aqparatty muqııat tekserip, qadaǵalaýǵa tájırbeli jedel ýákilder jumyldyrylǵan bolatyn. Almaty qalasyn meken etetin, esh jerde jumys istemeıtin Ignat esimdi bul azamat osyǵan deıin de birneshe ret esirtki qylmysyna baılanysty qylmystyq jaýapkershilikke tartylǵandyǵy belgili boldy. Qazirgi kezde esirtkiniń qalamyzǵa jetkizilý arnasy da áshkerelenip, bul qylmysqa qatysty ózge de azamattar anyqtalýda»,-deıdi Almaty qalasy ІІD-niń Esirtkige qarsy kúres basqarmasynyń bastyǵy polıtsııa podpolkovnıgi Denıs Loskýtov.
Qolǵa túskennen keıin kúdikti óz qylmysyn tolyǵymen moıyndap, óziniń aldaǵy qylmystyq josparlarymen de bólisken. Onyń bergen málimetterine qaraǵanda, ol tún jamylyp, esirtkini kóterme saýdamen tez arada satyp jibermekshi bolǵan.
«Qazirgi tańda kúdiktige qatysty QR QK 259-baby boıynsha esirtki zattaryn saqtaǵany úshin qylmystyq is qozǵaldy. Osylaısha biz asa iri kólemdegi marıhýananyń taratylýynyń jolyn kestik. Eskerte ketetin bolsaq, alyp shahar Almatyda esirtkige qarsy kúres barynsha kúsheıtilgen. Bul qylmyspen kúresýge ІІD-niń basqa da qyzmet túrleriniń qyzmetkerleri jumyldyrylsa, salaýatty ómir saltyn qoldaıtyn jastar da atsalysýda. Sondaı-aq Almaty qalasy ІІD-niń táýlik boıy jumys isteıtin senim telefondary arqyly turǵyndar tarapynan kelip túsetin túrli aqparattar esirtki qylmysynyń jolyn kesýge septigin tıgizýde»,-dep atap kórsetti D.Loskýtov.
Jalpyjyl basynan beri qala polıtseıleri 313 esirtki qylmysyn áshkerelegen. Zańsyz aınalymnan 300 keli, onyń ishinde 237 keli marıhýana, 27 keli gashısh, 12 keli geroın, 87 keliden asatyn basqa da esirtki zattary tárkilengen.
