Almatyda iri kólemde esirtki satýmen aınalysqan áıel ustaldy
ALMATY. 31 qańtar. QazAqparat /Názıra Eleýhan/ - Almatyda asa iri kólemde esirtki satýmen aınalysyp kelgen 30 jastaǵy Elena esimdi kelinshek qolǵa tústi.
Almatylyq polıtseılerdiń esirtki bıznesine qarsy kúres bólimshesiniń nazaryna túsken esirtki satýshysy birneshe kún boıy baqylaýǵa alynǵan, osy ýaqyt aralyǵynda kúdikti udaıy esirtkige táýeldilerge marıhýana, kóknár satyp kelgen.
«Azamatsha E. 25 qańtar kúni keshki saǵat bester shamasynda Medeý aýdany aýmaǵyndaǵy jeke úıde óziniń turaqty klıentine 18 gramnan astam marıhýana, al táýlikke jeter-jetpes ýaqyttan soń ol dál sol jerde jalpy salmaǵy 2 gramdy quraıtyn kóknárdiń birneshe túıinshegin satty. Munymen shektelmegen ol, esirtki zattarynyń taǵy bir bóligin kóterme saýdamen 26 qańtar kúni saǵat 16:00-de, ıaǵnı ol óziniń jekemenshik úıinde salmaǵy 1 keli 333 gramdy quraıtyn marıhýanany satty. Bul faktilerdiń barlyǵy qujattamaǵa bekitildi jáne osy qylmystyq istiń tolyq maǵlumattary tirkeldi. Jaýap alý barysynda Elena úsh aı boıy esirtki quraldaryn satyp kelgenin birden moıyndady. Qazir oǵan qatysty 259 baptyń 4 tarmaǵyna saı, esirtki quraldaryn zańsyz satý boıynsha qylmystyq is qozǵaldy. Qazirgi tańda qolǵa túsken kelinshek ýaqytsha oqshaýlaý ortalyǵyna toǵytyldy»,- dedi Almaty qalasynyń ІІD Esirtki bıznesine qarsy kúres basqarmasynyń bastyǵy, polıtsııa podpolkovnıgi Denıs Loskýtov.
Onyń aıtýynsha, bul áıel óziniń mundaı zańsyz is-áreketin kúıeýi men onyń áke-sheshesiniń kózinshe júzege asyryp kelgen. Ustalǵan azamatsha buryn-sońdy eshqandaı jaýapkershilikke tartylmaǵanymen, ol bir kezderi spırtti ishimdikke salynyp, arnaıy esepte turǵan.
