Almatyda iri kólemde aqsha saqtalǵan seıfti urlaǵandar áshkerelendi

Bul qylmys jeke kásipkerdiń keńsesinde, demalys kúni oryn alǵan. Qylmys ornynda tekserý júrgizgen jedel-tergeý tobynyń málimeti boıynsha, ońaı oljaǵa kenelmekshi bolǵandar JShS-ǵa kiretin esiktiń qulpyn syndyryp ashý arqyly ishke engen. Urylar tórteý bolǵan. Olar bul urlyqqa uzaq ári muqııat daıyndalǵan, qarapaıym qorǵanys quraldary - dabylqaqqysh pen mamandandyrylǵan kúzeti joq fırmalardy arnaıy tańdaǵan. Urlyq túngi ýaqytta jasalǵan. Jaqyn mańdaǵy jeke úılerdiń eshbir turǵyny bul ýaqytta kúdikti eshnárse estimegen. Tek jumysqa kelgen keńse qyzmetkerleri qulyptyń syndyrylǵanyn ańǵaryp, bul týraly polıtsııaǵa habarlaǵan.

"Seıfte 900 myń teńgeden asa qarajat bolǵan. Urylar qarajattyń barlyǵyn jaratyp úlgermegen. Biz olardyń tórteýin de Almatynyń turǵyn jaılaryndaǵy jaldamaly páterden quryqtadyq. Olar bul «sátti» urlyqtan keıin taǵy da osy ispettes qylmystardy jasaýdy josparlap otyrǵan. Biraq, biz olardy dál ýaqytynda áshkerelep, qolǵa túsirdik», - dedi Almaty qalasy ІІD Krımınaldyq polıtsııa basqarmasynyń qaraqshylyq shabýyl men tonaýdy ashý bóliminiń bastyǵy Janbolat Zııaddın.

Onyń aıtýynsha, bul toptyń eń úlkeni 25 jasta, al onyń kishi sybaılastary 20, 21, 22 jastaǵy jigitter. Barlyǵy elimizdiń ár oblystarynan kelgen. Bul jas qylmyskerlerdi birden birneshe sebepter - Almatyda turǵylyqty meken-jaılary men turaqty tabystarynyń joqtyǵy, qylmystyq jolmen tabylǵan bolsa da, jeńil aqshanyń qyzyqtyrǵandyǵy biriktirgen.