Almatyda iri bank klıentterine shabýyl jasaǵan azamattar ustaldy
ALMATY. 8 maýsym. QazAqparat - Almatyda ótken aptada bank klıentterine shabýyl jasaýǵa qatysty 3 oqıǵa tirkeldi. Polıtsııa málimetterine qaraǵanda qylmystyń bul túri kópten beri jıi boı kórsetýde.
Qalalyq Іshki ister departamentiniń Qylmystyq polıtsııa basqarmasy bastyǵynyń orynbasary Qanat Sarymsaqovtyń aıtýynsha, qaskóıler óte turpaıy ári salqynqandylyqpen áreket etken. Olar bank tóńiregin torýyldap, qurbandary jalǵyz-jarym kóp somadaǵy aqsha alýǵa keletin sátti baqqan. Sóz joq qylmyskerler qurbandarynyń áıel adam bolýyna nazar aýdarǵan. Degenmen jábirlenýshiler qatarynda er adamdar da az emes.
«Aram nıettiń júzege asý tásili men aılasyn jiti zertteı kele biz qylmystyń tapa-tal túste jasalǵanyn, qylmyskerler jábirlenýshini bankten úıine deıin ańdyp, ońtaıly sátte shabýyl jasaǵandaryn anyqtadyq. Bir tańdanarlyǵy qylmyskerler eshqandaı sýyq qarý qoldanbastan, azamattardy aıaǵynan shalyp qulatyp, qolyndaǵy qapshyqtaryn qaqshyp alyp, qashyp ketken. Qapelimde es jıyp úlgermegen jábirlenýshi azamattar olardy este saqtaı almaǵan. Sondyqtan dandaısyǵan qylmyskerler bet-beınelerin jasyrmaı erkin júrgen. Jábirlengender bir aýyzdan azııalyq 20-25 jasar azamattardy sıpattap berdi», - deıdi Q.Sarymsaqov. Onyń sózine qaraǵande, zertteý kezinde aıǵa jetpeıtin ýaqyt aralyǵyndaǵy oqıǵalarda bir qylmystyq toptyń qoltańbasy bary dáleldenip, bul olardy izdeýge serpin beredi. Kóp uzamaı Jambyl oblysy Merki aýdanynan kelgen jas shamalary 28-33 jas aralyǵyndaǵy jigitter ustaldy. Esh jerde jumys istemeıtin olar Almatydaǵy Túrksib aýdanynda páter jaldap turyp kelgen. Qylmystyq toptyń eki múshesi qolǵa túsip, úshinshisine izdeý jarııalandy.
