Almatyda iri apattyń oryn alýyna jol berilgen joq
ALMATY. QazAqparat - Almatyda órt sóndirýshiler Túrksib aýdanynda oryn alǵan qaýipti órtti sóndirip, gaz taratý pýnktiniń jarylýyna jol bergen joq, dep habarlaıdy QazAqparat tilshisi.
«14 maýsym kúni saǵat 17:16-da 101 pýltine Túrksib aýdanyna qarasty Súıinbaı dańǵylynda ornalasqan jeke úıdiń ıesinen órt shyqqandyǵy týraly habarlama tústi. №4 mamandandyrylǵan órt sóndirý bóliminiń alǵashqy toby oqıǵa ornyna 4 mınýttyń ishinde kelip jetkende 2 úıdiń shatyry janyp, irgeles dámhana shatyryn sharpyp jatty», - dep atap ótedi qalalyq tótenshe jaǵdaılar departamentinen.
Vedomstvo málimetinshe, ózge de irgeles nysandarǵa órttiń taralýy qaýpi joǵary boldy. Buǵan qosa, qyzyl jalynǵa oranǵan nysanǵa taqaý gaz taratý pýnktiniń ornalasqandyǵy da jaǵdaıdy odan ary qıyndata tústi. Sondyqtan oqıǵa ornynda jedel shtab qurylyp, órtti sóndirý eki ýchaskede júrgizildi. Apattyq qutqarý qyzmeti de oqıǵa ornyna shaqyrylyp, olar elektr jáne gaz jelilerin ajyratyp tastady.
Jedel qabyldanǵan sharalardyń nátıjesinde 250 sharshy metr aýmaqty sharpyǵan órti saǵat 18:06-da tolyq sóndirildi. Órt ornynan syıymdylyǵy 150 lıtr 3 gaz ballony qaýipsiz jerge shyǵaryldy jáne órttiń irgeles úılerge taralýyna jol berilmedi.
Qyzyl jalynmen kúreske 26 maman men 8 tehnıka jumyldyryldy. Zardap shekkender men qaza tapqandar joq.
