Almatyda ınjenerlik jelilerdi jóndeý jumystary qashan aıaqtalady
ALMATY.QazAqparat - Almatyda 12 shaqyrym jylý jelilerin jóndeý, qoldanystaǵy gaz qubyrlarynyń keńeıtý jáne 120 myńnan astam turǵynǵa arnalǵan jańa sý qubyrlaryn ótkizý jumystary aıaqtalýda, dep habarlaıdy QazAqparat tilshisi.
Almaty ákimdiginiń málimetinshe, qala ákimi Baýyrjan Baıbek jumys barysynda qalanyń ınjenerlik kommýnıkatsııalaryn jańartý qarqynyn teksergen.
Almaty qalasy Energetıka jáne kommýnaldyq sharýashylyq basqarmasynyń basshysy Maqsut Isahovtyń aıtýynsha, jaıaý jol bóligindegi ınjenerlik jelilerdiń qaıta óńdelýi aıdyń aıaǵynda aıaqtalmaq. Avtokólikterdiń barlyq ýchaskelerde kedergisiz júrýi qamtamasyz etiledi. Sonymen qatar, qaıta óńdeý kezinde qala turǵyndaryn úzdiksiz ystyq sýmen qamtamasyz etken ýaqytsha kestelerdi buzý jáne aýmaqty kóriktendirý boıynsha jumys jalǵasady.
«Bıyl Tóle bı (Varlamov - Ótegen batyr - Otarskaıa jáne Rozybakıev - Tlendıev kósh.), Bógenbaı batyr (Muqanov - Aıtıev kósh.), Jambyl (Pýshkın - Nazarbaev), Qazybek bı (Ýalıhanov - Abdýllın kósh.), Qarasaı batyr (Naýryzbaı batyr - Chaıkovskıı kósh.), Chaıkovskıı (Qarasaı batyr - Tóle bı) jáne Shagabýtdınov (Qurmanǵazy - Ortalyq stadıon) kóshelerinde ınjenerlik jeliler jańartyldy»,-dedi ákimdik baspasóz qyzmetinen.
Sońǵy jyldary Almaty qalasynda 800 shaqyrym ınjenerlik jeliler salynyp, qaıta óńdeldi. Onyń ishinde 313 shaqyrym sý qubyry, 266 shaqyrym káriz júıesi, 15 shaqyrym elektr qubyrlary jáne 32,3 shaqyrym jylý qubyrlary bar.
Uzyndyǵy 500-deı shaqyrymdy quraıtyn 524 kóshe jáne jaıaý júrginshilerge arnalǵan uzyndyǵy 100 shaqyrymdy quraıtyn jaıaýjol jóndeldi. Almatynyń 3 787 aýlasynan 1 400-deı aýla jańartylyp, qaıta jóndeldi. Barlyq jerasty ótkelderdiń kúrdeli jóndeý jumystary aıaqtalýda.
«Sonymen qatar, shahardyń tarıhı ortalyǵyn qaıta jóndeý jumystary jalǵasýda. Byltyr Panfılov, Jibek joly, Gogol, Qabanbaı batyr, Tólebaev, Baıseıtova kósheleri jáne «Astana» alańy jańartylsa, bıyl Abaı dańǵyly, Abylaıhan, Dostyq, Nazarbaev, Jeltoqsan kósheleri, «Almaty-2» beketiniń aýmaǵy jáne Respýblıka Saraıynyń aldyndaǵy alań jóndelýde»,-dep málimdedi Almaty ákimdigi baspasóz qyzmetinen.
