Almatyda ıntım qyzmet kórsetýdi talap etken polıtseı jumysynan shyǵaryldy
ALMATY. QazAqparat – Almaty qalalaq polıtsııa departamentiniń qyzmetkeri quqyq qorǵaý organynyń bedelin túsiretin teris qylyq jasaǵany úshin jumystan shyǵaryldy, dep habarlaıdy QazAqparat tilshisi.
Áleýmettik jelide Almaty qalalyq polıtsııa departamenti qyzmetkerine qatysty vıdeo paıda boldy. Onda kadrdan tys sóılegen boıjetken «er adamdy ókilettigin asyra paıdalandy» dep aıyptaıdy. Sondaı-aq, taǵy eki er adam onyń bodı massajǵa kelgenin, sodan keıin ıntım qyzmet talap etip, qyzdy zorlamaqshy bolǵanyn aıtady. Polıtsııa qyzmetkeri bárin joqqa shyǵarady. Rolıktiń sońynda janjal bastalady. Aqyry polıtseıdiń qyzmettik kýáligin vıdeoǵa túsiredi.
Almaty qalalyq PD baspasóz qyzmetiniń habarlaýynsha, atalǵan oqıǵaǵa qatysty departamenttiń ózindik qaýipsizdik basqarmasy qyzmettik tekseris júrgizgen.
«Búgin tártiptik komıssııanyń sheshimimen quqyq qorǵaý organynyń bedelin túsiretin teris qylyq jasaǵany úshin, «QR Memlekettik qyzmetshileriniń ádep kodeksi» talaptaryn saqtamaǵany úshin, sondaı-aq «Quqyq qorǵaý qyzmeti týraly» QR zańynyń talaptaryn buzǵany úshin Almaty qalasy PD patrýldik polk qyzmetkeri ishki ister organdarynan bosatyldy», - dep habarlady polıtsııadan.
