Almatyda «International Eduation Fair 2018» kórmesi ótip jatyr
ALMATY. QazAqparat - Almatyda «International Education Fair 2018» halyqaralyq bilim jármeńkesi jalǵasyn tapty, dep habarlaıdy QazAqparat tilshisi.
Halyqaralyq sarapshylar qatysqan aýqymdy shara bilim salasyndaǵy halyqaralyq áriptestikti damytýǵa, álemdik bilim-ǵylym keńistigine ıntegratsııalanýǵa, ózara tájirıbe almasýǵa baǵyttalǵan.
"Búginde elimizde ǵalamdyq bilim berý trendteri barlyq bilim berý satylarynda tıimdi júrgizilip keledi. Qazaqstanda 20 Nazarbaev zııatkerlik mektebi, Nazarbaev ýnıversıteti jumys isteıdi. Bolashaq stıpendııasy bar. Elbasynyń halyqqa joldaýynda azamattardyń ómiriniń sapasyn arttyrýdyń 10 mindeti aıqyndalǵan. Bilim salasynda basty basymdyq 7 mindet - adamı kapıtaldy damytýǵa berilip otyr. Búgingi halyqaralyq kórme osy basymdyqty júzege asyrýǵa baǵyttalǵan", - dedi memlekettik hatshy Gúlshara Ábdiqalyqova.
Frantsııanyń Qazaqstan Respýblıkasyndaǵy elshisi Fılıpp Martıne óz sózinde bıyl Qazaqstan men Frantsııa arasyndaǵy strategııalyq áriptestikke on jyl tolatynyn aıtyp, eki el arasyndaǵy seriktestik ǵylym-bilimmen tyǵyz baılanysty ekenin atap ótti. Elshi Frantsııa úkimetiniń shet eldik stýdentterdiń oqýyna birshama qarjy bóletinin jáne talapty stýdentterge zertteýler júrgizýleri men turmysyna stıpendııa bóletinin aıtty.
Astanada ótken kórme barysynda QR Bilim jáne ǵylym mınıstrligi men Frantsııa elshiligi arasynda yntymaqtastyq týraly memorandýmǵa qol qoıylyp, «Abaı-Vern» jobasy iske qosylǵany týraly habarlandy. «Abaı - Vern» baǵdarlamasy Frantsııa úkimeti men QR Bilim jáne ǵylym mınıstrligimen birlese iske asatyn stýdenttik mobıldilik baǵdarlamasy. 2018 jyldan bastap jyl saıyn baǵdarlama boıynsha 100 stıpendııa bólinetin bolady.
Sonymen qatar Shoqan Ýálıhanov atyndaǵy Kókshetaý memlekettik ýnıversıteti, Pavlodar memlekettik pedagogıkalyq ýnıversıteti men Shanhaı polıtehnıkalyq ýnıversıteti jáne «Halyqaralyq baǵdarlamalar ortalyǵy» AQ arasynda yntymaqtastyq týraly memorandýmǵa qol qoıyldy. Aıta ketý kerek, aıtýly sharaǵa 35 qazaqstandyq JOO men 75 tarta sheteldik oqý orny, 20 halyqaralyq bilim agenttigi qatysty.
Bul kórme 20 qańtarda Astanada, 22-23 qańtarda Shymkentte ótken bolatyn.
