Almatyda ınsýlt alǵan Ekinshi dúnıejúzilik soǵys ardageri aman qaldy
Almaty qalalyq qoǵamdyq densaýlyq saqtaý basqarmasy habarlaǵandaı, soǵys ardageri Ivan Shınkarev 98 jasqa tolar aldynda ınsýlt alyp, Almaty №4 qalalyq klınıkalyq aýrýhanasynyń nevrologııalyq bólimshesine shuǵyl túrde jatqyzyldy. Oǵan bas mıynyń trombozynan týyndaǵan tserebraldy ınfarkt dıagnozy qoıyldy.
«Ardager tańǵy asty iship otyrǵan kezde qolynan kesesin túsirip alady ári sóıleı almaı qalady. Nemereleri onyń jaǵdaıynyń nasharlaǵanyn túsinip, ony shuǵyl túrde №4 qalalyq klınıkalyq aýrýhananyń nevrologııalyq qabyldaý bólimine jetkizedi. Munda ony nevropatolog, terapevt jáne reanımatolog mamandar tekseredi. Qabyldaý bóliminde bas mı tomografııasyn jasap, naýqasty mamandandyrylǵan bólimshege jatqyzýdy uıǵardyq. Onyń jaǵdaıy júrek jáne tserebraldy jetkiliksizdikke baılanysty aýyr dep baǵalandy», - dedi aýrýhananyń nevrologııa bólimshesiniń meńgerýshisi Dınara Muhanǵalıeva.
Dárigerler konservatıvti emdeý týraly sheshim qabyldaıdy. Sebebi, naýqasta kóptegen sozylmaly patologııa boldy jáne kez kelgen hırýrgııalyq aralasý ardager úshin óte qaýipti boldy. Mamandar kún saıyn maıdangerdiń densaýlyǵynyń jaǵdaıy men negizgi kórsetkishterine klınıkalyq, zerthanalyq jáne aspaptyq zertteýler júrgizdi. Ony kúndelikti terapevt, nevropatolog jáne kardıolog dárigerler qarap turdy.
№4 qalalyq klınıkalyq aýrýhananyń emdeýshi dárigeri, nevropatolog Jáńgir Ábdıevtiń aıtýynsha, EKG, bas mıǵa KT, ehokardıografııa, aıaq-qol tamyrlaryna ÝDZ, keýde qýysy múshelerine KT kórsetkishteri únemi baqylaýda boldy. Nátıjesinde Ivan Afanasevıchtiń jaǵdaıy jaqsaryp, saýyǵa bastady. 10 kúnnen keıin, 98 jasqa tolǵan kúni ardager aýrýhanadan shyǵaryldy.
«Biz tamaqta as tuzyn shekteýdi usyndyq. Sebebi bul ınsýlt pen ınfarkt qaýpin 19-20%-ǵa tómendetedi. Kalıı men magnııge baı jemis pen kókónisti kóbirek jeýdi usyndyq. Taǵamǵa teńiz ónimderin engizgen durys. Janýar maılaryn tutynýdy azaıtqan jón. Naýqas qan qysymyn, qandaǵy qantty únemi baqylaýdy qajet etedi jáne ýchaskelik dáriger usynǵan dári-dármekti kúndelikti qabyldaýdy umytpaýy kerek. Jeke tańdalǵan dári-dármekti únemi qoldaný ınsýlt qaýpin 40%-ǵa tómendetedi», - dedi Jáńgir Ábdıev.
Qazir soǵys ardageri Ivan Afanasevıchti úıinde úlken otbasy, ıaǵnı, 2 balasy, 4 nemeresi jáne 8 shóberesi kútip jatyr
Aıta keteıik, Shınkarev Ivan Afanasevıch – Ekinshi dúnıejúzilik soǵys ardageri. Ol búkil soǵysty basynan ótkergen. 17 jasynda áskerge shaqyrylyp, maıdanda pýlemetshi boldy. Baltyq elderinde soǵysyp, úsh ret jaraqat alyp, elge oralǵan.