Almatyda Instagram arqyly eldi aldaǵan jas jigit ustaldy
ALMATY. QazAqparat - Almatyda Instagram jelisin paıdalanyp adamdardyń aqshasyn jymqyrǵan 23 jastaǵy er adam ustaldy, dep habarlaıdy QazAqparat tilshisi.
Qazir oǵan qatysty sotqa deıingi tergeý jumystary júrip jatyr.
«Ol Instagram áleýmettik jelisinde «Olimp_bets_kzzz» tobyn qurǵan. Ol býkmekerlik keńselerdiń stavkasy arqyly aqshany kóbeıtip berem dep ýáde bergen. Adamdar aqshasyn 10 ese ósiremin degen aldaýǵa senip qalyp, pablık admıniniń «8-700-694-14-52» kıvı-ámııanyna aqsha aýdaryp otyrǵan. Aqshany alyp alǵan soń ol klıentterimen baılanysty úzip, paraqshany buǵattap otyrǵan. Qazirgi tańda onyń 4 qylmysqa qatysy bary anyqtaldy. Jalpy alǵanda alaıaq jigit adamdardan 6 mln teńge alǵan. Bul derek boıynsha QR QK 190-babynyń 2-bólimimen sotqa deıingi tergeý jumystary bastaldy», - dedi qalalyq Polıtsııa departamentiniń Krımınaldy polıtsııa basqarmasynyń basshysy Esen Ysqaqov.
Polıtsııa osy adamnyń áreketinen zardap shekkender bolsa, 298-51-36; 8-747-818-31-99 nómirlerine habarlasýyn suraıdy.
