Almatyda ınnovatsııalyq óner ortalyǵy salynady
ALMATY. QazAqparat - Almatyda ınnovatsııalyq óner ortalyǵy salynady. Bul týraly Naýryzbaı aýdanynyń ákimi Sanjar Toǵaı onlaın brıfıng barysynda málim etti, dep habarlaıdy QazAqparat tilshisi.
Onyń aıtýynsha, aldaǵy ýaqytta aýdandyq ákimshilik ortalyq janynan Innovatsııalyq óner ortalyǵy, «Taý samaly» yqshamaýdanynda múmkindigi shekteýli balalarǵa arnalǵan mýzykalyq mektep, eki dene shynyqtyrý-saýyqtyrý keshenin salý josparlanyp otyr.
Sonymen qatar ol aýdanda jańadan taǵy da birneshe emhana salynatynyn aıtty.
«Densaýlyq saqtaý salasyna kelsem, jańadan salynǵan 4 emhanamen qatar, «Quramys» yqshamaýdanynda 500 oryndyq emhana, «Aqjar» yqshamaýdanynda 200 oryndyq januıalyq-dárigerlik ambýlatorııasyn salý jáne halyq shet turatyn aımaqtardy mobıldi ambýlatorııa ashý josparlanýda. Al, bilim berý salasyna kelsem, sapaly bilim berý men mektepterdegi oryn tapshylyǵyn joıý úshin «Qalqaman» yqshamaýdanynda 2 mektep, «Qaraǵaly» yqshamaýdanynda bir mektep, «Qalqaman», «Qaraǵaly», «Shuǵyla» yqshamaýdandarynda 3 bala baqsha qurylystary bastalmaq»,-dedi ol.
Aýdanda qazir eki mekteptiń qurylysy bastalyp ketken, sondaı-aq taǵy bir mekteptiń qurylysy bitýge jaqyn.
«Qalqaman» yqshamaýdanyndaǵy 1500 jáne 1800 orynǵa arnalǵan 2 mekteptiń qurylysy bastaldy, «Aqjar» yqshamaýdanyndaǵy №186 mektepke qosymsha qurylys ǵımaraty aıaqtalýda. «Qarǵaly» jáne «Aqjar» yqsham aýdandarynda 2 jekemenshiktik mektep salynyp jatyr. Sondaı-aq Aqjarda órt sóndirý deposynyń qurylysy júrgizilýde» ,-dedi aýdan ákimi.
