Almatyda «Innovatsııalyq ekonomıka jáne adam damýyndaǵy bilim berý komponenti: bilim berýdegi menedjment» taqyrybynda halyqaralyq ǵylymı-tájirıbelik konferentsııa ótip jatyr
ALMATY. Sáýirdiń 14-i. QazAqparat / Ádilet Musahaev / - Bilim qýyp kelgen balany ǵulama Sátbaevtyń deńgeıine jetkizý ol, árıne oqý júıesine baılanysty.
Sondyqtan jastardy sapaly kitaptarmen qamtamasyz etip, sheteldik JOO men baılanys ornata otyryp tájirıbe almasqan jón. Bul jaıynda professor Rahman Alshanov konferentsııa barysynda aıtty, dep habarlaıdy QazAqparat.
R.Alshanovtyń aıtýynsha, búgingi sharanyń maqsaty bilim salasyndaǵy sheteldik jáne ózimizdiń mamandardyń tájirıbesin ushtastyra otyryp, keleshekte bir júıege keltirý.
«Qazir daryndy, talantty balalar kóp, mine solarǵa jaǵdaı jasaýymyz kerek. Óıtkeni bilim salasynda qazir burynǵydaı qatyp qalǵan júıe joq, bilim salasynda kúndelikti jańalyqtar ashylyp, damyp barady», deıdi R.Alshanov.
«Qazir bilim, ǵylym damýynyń mańyzy qoǵam damýynda ósip kele jatyr. Qoǵamnyń, eldiń bolashaǵy tikeleı bilimniń damýyna baılanysty. Bilimdi damytý úshin aldymen óz elimizdegi múmkindikterdi tolyǵymen paıdalanýymyz kerek. Mysaly, bilim júıesin basqarý osy kúnge deıin jeke másele retinde qaralmaı kele jatyr. Shyn mánisinde bilim de basqa bir sala sııaqty úlken júıe, sondyqtan oǵan memlekettiń nazary, kómegi kerek. Mine osy júıeni memlekettik turǵyda damytý úshin qandaı problemalardy sheship, ne isteý kerek degen sııaqty máseleler osy sharada qaralyp jatyr», deıdi QazUPÝ-diń esep jáne aýdıt kafedrasynyń professory Kópjasar Náribaev.
Sáýirdiń 15-ne deıin jalǵasatyn atalmysh shara QazUPÝ-de ótip jatyr. Oǵan Ýraına, Kanada, Japonııa, Ulybrıtanııa men Germanııa jáne taǵy basqa eldiń ókilderi qatysyp, elderindegi bilim salasy júıesimen jáne sol salada jetken jetistikteri jaıynda baıandap, tájirıbelerimen bólisýde.
