Almatyda Indýstrııaldyq aımaqta 13 jańa ónerkásip óndirisi iske qosylady
ALMATY. QazAqparat -Almatyda Indýstrııaldyq aımaq aýmaǵynda 13 jańa ónerkásip óndirisi qurylysyn júrgizýde, dep habarlaıdy QazAqparat tilshisi qalalyq ákimdikke silteme jasap.
2019 jylǵa deıin balmuzdaq óndirisi fabrıkasy, et óńdeý kesheni, munaı ónerkásibi úshin qaǵaz ydystar, qubyrlar shyǵaratyn zaýyttar ashylady.
Bul týraly Alataý aýdanynda «Indýstrııaldyq aımaq jáne ónerkásip» taqyrybynda ótken Investıtsııalyq forýmda Almaty qalasynyń Indýstrıaldyq aımaǵy» (IA) JShS bas dırektory Ádil Bórlibaev habarlady.
Onyń aıtýynsha, jumys istep turǵan kásiporyndar, qazirgi ýaqytta, kommýnaldyq qyzmetterdi tóleý arqyly memlekettiń ınfraqurylym qurylysyna salǵan qarajattaryn qaıtarýda.
Sondaı-aq, Bórlibaev ınvestorlarǵa bos jer baryn paıdalanyp, óndiristerin Indýstrııaldy aımaqta ornalastyrýǵa shaqyrdy.
Kózdelgen 275,6 ga bos jer teliminiń 75 ga-sy óndiris qurylysyn salýǵa arnalǵan.
Spıker ındýstrıaldyq aımaqta óndiristi ornalastyrǵan jaǵdaıda shyǵyndar túpkilikti azaıatynyn aıtty.
«Jer telimin jalǵa berýdiń mólsherlemesi jylyna bir sharshy metr úshin bar-joǵy 42 teńgeni quraıdy. Sondaı-aq, Almaty qalasynyń ortalyǵyna tikeleı jaqyn ornalasqan jer teliminiń bolýy artyqshylyq bolyp tabylady. Qazaqstannyń eń iri qalasy - bul elimizdiń barlyq óńirlerin baılanystyratyn ári ótim naryǵy, ári logıstıkalyq ortalyq», - dedi ol.
Sonymen birge, forým barysynda Alataý aýdany ákiminiń orynbasary Qaıyrjan Jaqsymbetov aýdannyń ınvestıtsııalyq áleýeti týraly aıtyp berdi,
Onyń aıtýynsha, aýdan qurylǵaly beri bıýdjetten 300 mlrd teńgeden astam aqsha bólindi.
«Aýdan boıynsha negizgi kapıtalǵa salynǵan ınvestıtsııa kólemi 9 jyldyń ishinde 3 mıllıard teńgeden 100 mıllıard teńgege deıin ósti. Aýdannyń taýar aınalymy 889 mıllıon teńgeden 772 mıllıard teńgege deıin artty. Invest ahýaldy jaqsartý boıynsha basty mindetterdiń biri shaǵyn jáne orta bıznesti damytý, sondaı-aq ákimshilik kedergilerdi tómendetý bolyp tabylady. Bul baǵytta úlken jumys atqarylyp jatyr», - dedi ol.
«Indýstrııalandyrý kartasy» baǵdarlamasynyń sheńberinde Alataý aýdanynda 25 joba iske asyrylýda. onyń 24-inde shamamen 5000 jańa jumys orny ashylady.
«Bıznestiń jol kartasy-2020» baǵdarlamasy boıynsha quny 619 mln teńge bolatyn 9 joba memleket qoldaýyna ıe boldy.
