Almatyda Indýstrııalandyrý kartasyna taǵy 22 joba endi

ALMATY. QazAqparat - Búgin qala ákimi Baýyrjan Baıbektiń tóraǵalyǵymen ótken úılestirý keńesiniń otyrysynda Almatynyń 2015-2019 jyldarǵy ındýstrııalandyrý kartasyna ındýstrııalyq ınnovatsııalyq jobalardy engizý máselesi talqylanyp, Alataý aýdanyndaǵy Indýstrııalyq aımaqta júzege asatyn jobalar irikteldi.

Almatyda Indýstrııalandyrý kartasyna jalpy quny 62,2 mlrd teńge bolatyn 22 joba endi.

Aıta ketý kerek, buǵan deıin ekinshi besjyldyqtyń ındýstrııalandyrý kartasyna jalpy quny 17,6 mlrd teńge bolatyn 7 joba engen bolatyn.

«Kartaǵa jasyl dálizdi qamtamasyz ete alatyn, ekologııalyq turǵydan qaýipsiz jobalar enýi kerek. Búgin quny 62,6 mlrd teńge bolatyn 22 jańa jobany qabyldadyq. Endi 2015-2019 jyldardaǵy kartaǵa 29 joba enip otyr. Olardyń jalpy quny 80,2 mlrd teńge. Jańa jobalar 4 myńǵa jýyq turaqty jumys ornyn ashýǵa kómek beredi. Qurylys kezinde 5 myńǵa taıaý adam jumyspen qamtylady. Olardyń 9-yna Alataý arnaıy ekonomıkalyq aımaǵynan jer telimderin bólý týraly sheshim shyǵaryldy», - dedi B.Baıbek.

Qala basshysynyń orynbasary Erlan Áýkenovke atalǵan jobalardy ınfraqurylymmen qamtyp, qujattyq máselelerin sheshýdi tezdetý tapsyryldy.

«Jerdi eksportqa beıimdelgen joǵary tehnologııalyq óndirýshilerge berý kerek. Mundaı jobalar bar. Biraq olar az», - dedi qala ákimi.

Qalalyq kásipkerlik jáne ındýstrııalyq-ınnovatsııalyq basqarma basshysy Álfııa Balova úılestirý keńesine 22 joba jaıly baıandap berdi.

Onyń aıtýynsha, qabyldanǵan jobalardyń 8-i qurylys ónerkásibiniń sýbektileri bolsa, tamaq ónerkásibinen - 3, hımııalyq ónerkásipten - 1, mashına jasaý salasynan 1 joba maquldandy.

Sondaı-aq, Alataý arnaıy ekonomıkalyq aımaǵynan qurylys ónerkásibi boıynsha 3 joba, farmatsevtıkalyq sala boıynsha 3 joba, hımııalyq ónerkásip boıynsha 3 jobaǵa jer telimderi bólinetin boldy.