Almatyda ımmýnızatsııa aptalyǵy bastaldy
ALMATY. QazAqparat - Almatyda ımmýnızatsııa aptalyǵy bastaldy. Shara sáýirdiń 22-26 aralyǵynda ótkiziletin «Adam ómirin qorǵaý» atty eýropalyq ımmýnızatsııa aptalyǵyna oraı uıymdastyryldy. Búgin Almatyda atalǵan aptalyq aıasynda baspasóz máslıhaty ótti.
«Erteń DDSU uıymynyń bastamasymen eýropalyq ımmýndaý aptalyǵy bastalady. Sonyń aıasynda elimizde birqatar sharalar ótkizilmek. Qazirgi kúni ekpeniń 5 jasqa deıingi balalardyń densaýlyǵyn qorǵap, ómirin aman alyp qalý úshin mańyzy zor ekendigi belgili boldy. DDSU deregi boıynsha, ekpeniń arqasynda jyl saıyn jer betinde 3 mln. adam ólimnen aman qalady eken. Osy baǵytta elimizde bıyl 15 mlrd. teńge qarastyrylyp otyr», - dedi Sanıtarlyq-epıdemıologııalyq saraptama jáne monıtorıng ǵylymı-praktıkalyq ortalyǵynyń dırektory Shalǵynbaı Ótegenov. Mamandardyń aıtýynsha, qazirgi tańda ekpeniń sapasy joǵarylap, onyń qaýipsizdigi joǵary dárejege jetti. «Immýndaýdyń memlekettik baǵdarlamasynyń arqasynda sal aýrýy 2010 jyldan beri tirkelmegen. Buǵan deıin sońǵy aýrý 1995 jyly tirkelgen edi. Osy ýaqytqa deıin kúl aýrýy áli bir ret tirkelmedi. Qazir QR ulttyq ekpe kúntizbesine 11 túrli aýrýǵa qarsy ekpe kiredi», - dedi Sanıtarlyq-epıdemıologııalyq saraptama jáne monıtorıng ǵylymı-praktıkalyq ortalyǵynyń bólim bastyǵy Aınagúl Qýatbaeva. Onyń aıtýynsha, aptalyq sheńberinde shalǵaıda ornalasqan eldi mekenderdiń turǵyndaryn ekpemen qamtý úshin arnaıy brıgadalar uıymdastyrylatyn bolady.
