Almatyda ımmýndaý aptalyǵy bastalady
Immýndaý aptalyǵynyń maqsaty – turǵyndardy vaktsınatsııamen qamtý deńgeıin arttyrý, halyqqa árbir balanyń ekpemen aldyn alatyn aýrýlardan qorǵalýy qajet ekenin túsindirý.
«Vaktsınoprofılaktıka – medıtsınanyń eń úlken jetistigi jáne Qazaqstanda ǵana emes, búkil álemde qoǵamdyq densaýlyq saqtaýdyń ekonomıkalyq tıimdi sharasy. Vaktsınatsııa – halyqty juqpaly aýrýlardyń paıda bolýy men taralýynan qorǵaýdyń eń tıimdi quraldarynyń, sonymen qatar eń qaýipsiz medıtsınalyq aralasýlardyń biri. Ulttyq egý kúntizbesine sáıkes josparly túrde týberkýlezge, V vırýstyq gepatıtine, polıomıelıtke, kókjótelge, sirespe dıfterııasyna, qyzylshaǵa, qyzamyqqa, epıdemııalyq parotıtke, gemofıldi jáne pnevmokokkty ınfektsııaǵa qarsy vaktsınatsııa júrgiziledi», -dedi Almaty qalalyq sanıtarlyq-epıdemıologııalyq baqylaý departamentiniń basshysy Qasymhan Alpysbaıuly.
Onyń aıtýynsha, búginde vaktsınalardyń ekiden altyǵa deıingi komponentterin bir dozada biriktirýge múmkindik beretin, ınektsııalardyń sanyn azaıtatyn vaktsınalar bar. Bizdiń elde qoldanylatyn barlyq vaktsınalardy DDU paıdalanýǵa usynǵan jáne Qazaqstanda tirkelgen.
«Respýblıka aýmaǵynda qoldanylatyn vaktsınalar qaýipsiz jáne tıimdiligi joǵary», - dedi ol.
Sonymen qatar, ol kóptegen ata-ana profılaktıkalyq vaktsınany balalaryna egýden bas tartatynyn tilge tıek etti.
«Bul rette ártúrli áleýmettik jelide taralatyn burmalanǵan, durys emes aqparat keri áser etedi. Balasyna vaktsına salǵyzýdan bas tartqan ata-analar tek ózderine ǵana emes, basqa balalarǵa da juqtyrý qaýpin týdyrady», - dedi ol.
Almaty qalasynda Eýropalyq ımmýndaý aptalyǵyn ótkizý kezeńinde vaktsınatsııa turǵylyqty jeri boıynsha emhanalarda tegin júrgiziledi. Qala emhanalary vaktsınatsııa máseleleri boıynsha halyqqa konsýltatsııalyq kómek kórsetýge, vaktsınatsııa týraly derektersiz basqa óńirlerden kelgen nemese ekpe almaǵan balalardy egýge daıyn.