Almatyda ımamdar sporttan baq synasty
Juma namazynan soń Almaty qalasy ákiminiń orynbasary Arman Qyryqbaev pen Nurbek Áýeshanuly sóz alyp, jınalǵan qaýymdy merekemen quttyqtady.
Qazaq halqynyń mádenıeti men dástúrin nasıhattap, birlik pen yntymaqty dáripteý maqsatynda uıymdastyrylǵan sharaǵa qaladaǵy 48 meshitiniń ókilderi qatysty.
Sonymen qatar, Almaty turǵyndary men qonaqtary ulttyq sport túrlerinen baq synasty. Atap ótsek, jınalǵan xalyq qazaq kúresi, asyq atý, gir kóterý, baǵanaǵa shyǵý, láńgi tebýden ózara myqtyny anyqtady. Sondaı-aq, kórermender «Alashuly» tobynyń oryndaýyndaǵy ulttyq ánderin, «Dombyra» ansambliniń ulttyq aspaptardaǵy týyndylaryn, tilek bildirýshi kishkentaı búldirshinderdiń óleńderin tyńdady.
Jarys jeńimpazdary men júldegerlerine merekelik shara uıymdastyrýshylarynyń atynan baǵaly syılyqtar tabystaldy.
Aıta ketsek, qoshqar kóterýden júırik atanǵan Jasulan Qoltyqbaev 35 kelilik qoshqardy 110 márte kóterip úzdik atansa, taǵy bir azamat gir kóterýden 16 kelilik temirdi 38 mınýtta kóterip el yqylasyna bólendi.
«Daıyndyqsyz qoshqardy jeńip alý ońaı emes. Alaıda, ózim júk tasýshy bolǵandyqtan, men úshin bul úırenshikti jattyǵý desem de bolady. Osynshama qatysýshynyń ishinen myqty atanamyn dep oılamadym. Biraq, men odan da kóp kótere alamyn. Mereke óte unady, bul sporttyq shara keremet kóńil-kúı syılady. Uıymdastyrýshylarǵa degen alǵysym sheksiz», - dedi jeńimpaz Jasulan.
Sondaı-aq, mereke qonaqtary úshin arnaıy kıiz úıler, batýt qalashyǵy, oıyn alańdary jasaldy. Balalarǵa arnalǵan túrli saıystar ótkizilip, tátti taǵamdar men sýsyndar taratyldy.
Erteń meshit jamaǵaty men ımamdar arasynda «Narhoz» ýnıversıteti stadıonynda fýtbol jarysy ótedi.
Sporttyq sharany Almaty qalasy dene shynyqtyrý jáne sport basqarmasy men dinı basqarmasy uıymdastyryp otyr.
