Almatyda Іlııa Jaqanovtyń «Dúnıe, shirkin...» kitabynyń tusaýkeseri ótti
Ádebı-sazdy keshke QR eńbek sińirgen qaıratkerleri Іlııa Jaqanov, Altynbek Qorazbaev, Júrsin Erman, Ermurat Úsenov, Sh. Ýálıhanov atyndaǵy Tarıh jáne etnologııa ınstıtýtynyń dırektory Hangeldi Ábjanov, belgili óner maıtalmandary Bekjan Turys, Gúlmıra Sarına, Ardaq Balajanova, Janǵalı Júzbaev, Gúlzıra Bókeıhanqyzy, Qorqyt ata atyndaǵy ǴZI dırektorynyń orynbasary, PhD doktory Nurbolat Bógenbaev jáne Qyzdar ýnıversıtetiniń ǵylymı-pedagogıkalyq quramy men stýdentteri qatysty.
Bul esse-elegııalyq kitap Alash ardaqtylarynyń aty men shyǵarmashylyǵyn, memlekettik qyzmetin aqtaýǵa, qoǵamdyq sananyń jańǵyrýyna, elimizdiń ǵylymy men biliminiń damýyna, ádebıeti men tiliniń, mádenıeti men óneriniń ósip-órkendeýine úles qosqan Myrzataı Joldasbekovtiń kompozıtorlyq-ımprovızatorlyq shyǵarmashylyǵy týraly sýretteıdi.
Oqý ornynyń rektory Dınar Nóketaeva qaıratker tulǵanyń ult rýhanııatyna, qazaq ádebıeti men óneriniń damýyna qosqan ólsheýsiz úlesin jetkizdi. Sondaı-aq, el táýelsizdiginiń nyǵaıýyna atsalysyp kele jatqan tulǵalarǵa úlken istiń tusaýyn Qyzdar ýnıversıtetinde keskendikterine zor rızashylyǵyn bildirip, seksenniń seńgirine shyqqan kitaptyń avtory Іlııa Jaqanovtyń ıyǵyna qundyz shapan japty.
«Akademııalyq utqyrlyq boıynsha otandyq jáne sheteldik ǵalymdar oqý ordamyzǵa kelip, dáris oqıdy. Qazaq ádebıetiniń bilgiri, ǵalym, qoǵam qaıratkeri Myrzataı Joldasbekov aǵamyz osy baǵdarlama boıynsha dáris oqý jónindegi usynysymyzdy qabyl alyp, eki kúnnen beri Qyzdar ýnıversıtetiniń stýdentteri, fılologııa, óner mamandyqtarynyń tálimgerleri tamasha sabaq tyńdap jatyr. Búgingi ádebı-sazdy keshte qazaqtyń tanymal perzenti Іlııa Jaqanov aǵamyzdyń «Dúnıe, shirkin..» atty kitabynyń tusaýy kesilip, kópshilikke tanystyryldy. Jańa týyndy qutty bolsyn! Bolashaq urpaq izdep oqıtyn, bilim shólin qandyratyn kitapqa aınalsyn!» dedi Qyzdar ýnıversıtetiniń rektory Dınar Nóketaeva.
«Mine, Almatydan alystap, Atyraýda batys ónerin zerttep, shyǵarmashylyqpen aınalysyp jatqanyma on alty jyl boldy. Turlaýsyz myna ómirde arzan, dańǵara shoýlardyń kóbeıgen shaǵynda óte qundy dúnıege shólirkep júrgende Atyraýda «MuzArt» tobynyń kontserti ótti. Sol kontsertte Myrzekeńniń «Dúnıe, shirkin...» áni oryndaldy. Ándi tyńdap otyryp keremet kúı keshtim. Mazmundy, maǵynaly, ǵajap ánnen tebirenip qaıttym. Mýzykaǵa kelgende óte kirpııaz adammyn. Talǵammen qaraımyn. Biraq, «Dúnıe, shirkin...» ániniń fılosofııalyq bitimi, onyń qııaldyǵy alysqa uzatatyn tereńdigi ózgeshe qubylys. Mine, sodan soń Myrzataı Joldasbekovtiń shyǵarmashylyǵyna arnap kitap jazýdy jón kórdim», dedi Іlııa Jaqanov.
Belgili sazger ádemi estelikterimen bólise kele, birneshe ánin shyrqap berdi. Jazýshy-kompozıtor Qyzdar ýnıversıtetine 80 ániniń mátini men notasy jaryq kórgen kitabyn tartý etti.
Ádebı sazdy keshte Bekjan Turys, Gúlmıra Sarına, Ardaq Balajanova, Janǵalı Júzbaev, Gúlzıra Bókeıhanqyzy sekildi óner maıtalmandary Myrzataı Joldasbekovtiń «Dúnıe, shirkin», «Áı, ýgáı, armandamyn Jaratqanǵa», «Báıterek», «Qyz dáýren Aqbota» sekildi ánderi men «Tolǵaý» jáne «Qosbasar» kúılerin oryndap, jınalǵan qaýymǵa qazaq dástúrli óneriniń qudiretin sezdirdi.
