Almatyda ilbis beınelengen mýral qaıta qalpyna keltiriledi
«Biz ilbis beınelengen mýralǵa qatysty jaǵdaıǵa shyn júrekten ókinemiz. Coca-Cola brendi adamdardyń kóńilin túsirýdi emes, kóterýdi nıet etedi jáne adamdardy biriktirýge tyrysady. Árbir kompanııada jumys isteıtin adamdar bar jáne kez kelgen adam qatelesýi múmkin. Bul joly biz de qatelik jiberdik. Іlbis beınelengen mýraldy aýystyrý týraly sheshimimiz paıda kórý, varvarlyq nıetpen nemese almatylyqtardy renjitý nıetinen týyndaǵan joq. Ókinishke qaraı, biz aldyn ala barsha jurtshylyqtyń pikirin suramaı, PIK-tiń úı turǵyndarynyń kelisimi týraly kelisimimen mýraldy aýystyrýda asyǵystyq tanyttyq. Barys beınelengen sýrettiń avtorynan da keshirim suraımyz», - dep habarlady kompanııadan.
Sondaı-aq, kompanııa ókilderiniń aıtýynsha, bastapqyda bul maqsatqa basqa úıdiń qabyrǵasy tańdalǵan bolatyn, biraq turǵyndardan qajetti mólsherde kelisim ala almadyq – olar túngi jumys kezinde shý bola ma dep alańdaıtynyn jetkizdi, óıtkeni jumys túnde de, kúndiz de júrgizilýi kerek edi.
«Sodan keıin balama retinde ilbis beınelengen qabyrǵa usynyldy. Osynaý úlken qatelikke jol bergen tájirıbemizden keıin biz ilbis beınelengen mýral almatylyqtarǵa qanshalyqty qundy ekenin túsindik. Biz óz mýralymyzdy alyp tastaımyz jáne ilbis beınelengen mýraldy qalpyna keltiremiz»,- dep habarlady kompanııadan.
Sonymen qatar, jaqynda kompanııa qaıta óńdelgen plastıkten túrli tústi kóshe oryndyqtaryn jasap, olardy Gorkıı atyndaǵy saıabaqqa ornatty.
«Biz budan da kóp oryndyq jasaımyz, sonymen qatar, qalada tennıs ústelderin ornatamyz, olardyń ústine jergilikti strıt-art sýretshilerinde sýret salynady. Biz qalaǵa serpindi jáne jarqyn kórinis berýge, basqa da ıdeıalarǵa ashyqpyz. Biz qalamyzdy jaqsy kóremiz jáne almatylyqtardan taǵy da keshirim suraımyz. Biz beı-jaı qaramaǵan jáne azamattyq ustanymyn ashyq bildirgenderdiń bárine alǵys aıtamyz»,- dep atap ótti kompanııa ókilderi.
Buǵan deıin Almaty ákimdigi turǵyn úılerdiń birine salynǵan ilbis mýralynyń nege aýystyrylǵanyn túsindirgen edi.
