Almatyda ilbis beınelengen mýral qaıta qalpyna keltirildi
Eske salaıyq, mamyr aıynyń basynda Abylaı han dańǵyly, 59/61 mekenjaıyndaǵy turǵyn úıdiń qasbetindegi qar barysynyń mýraly «Coca-cola Qazaqstan» kompanııasynyń jarnamalyq mýralyna aýysqan bolatyn.
«Coca-Cola Qazaqstan» kompanııasy turǵyndardan keshirim surap, mýral qaıta qalpyna keltiriletinin aıtty.
Almaty ákimi Erbolat Dosaev Almaly aýdanynyń turǵyndarymen kezdesý kezinde qaladaǵy mýraldar máselesine qatysty óz oıyn bildirgen edi.
«Qaladaǵy mýraldarǵa resmı mártebe berý qajet, áıtpese, mýraldardyń máselesi sheshilmeıdi. Qazirgi tańda Almatynyń dızaın-kodyn ázirleý jumysy bitýge jaqyn. Onda mýraldar jeke bolady, al jarnamany ornalastyrý men basqa da ózgerister qalalyq qurylys jáne ýrbanıstıka basqarmasymen kelisilýi tıis», - degen bolatyn Erbolat Dosaev.
