Almatyda ıisshil ıtter esirtki tabýdan saıysqa tústi
ALMATY. QazAqparat - Almatyda ıisshil ıtter esirtki zatyn tabýdan saıysqa tústi. 5 kúnge sozylǵan respýblıkalyq kınolog mamandar arasyndaǵy saıys búgin márege jetti, dep habarlaıdy QazAqparat tilshisi.
16 ıisshil ıt avtobýsta, ushaqta, kólikte jasyrynǵan esirtki zattaryn tabýdan ózara baq synasty.
Ózine júktelgen mindetti atqarýda erkshe jedeldik tanytqan Ońtústik Qazaqstan oblysy Memlekettik kirister departamentiniń kınolog mamany Ǵanı Abdramanovtyń «Naıza» atty ıti birinshi orynǵa shyqty.
Ekinshi orynǵa Memlekettik Kirister departamentiniń kınologııalyq ortalyǵynyń mamany Marat Tileýkeevtiń «Dak» atty ıti laıyq dep tanyldy.
Úshinshi orynǵa laıyqty nátıjeni Mańǵystaý oblystyq MKD ókili Nurbol Sabanovtyń «Barbı» atty ıti kórsetti.
Jeńimpazdardyń barlyǵyna ıtti baǵýǵa qajetti quraldar men baǵaly syılyqtar tabys etildi.
«Bizdiń ortalyqta ıtter kúshik kezinen baǵylady. Bastapqy kezde ıttiń minez-qulqy men erekshelikterine qaraı oǵan kınolog maman bekitilip beriledi. Olarǵa nusqaý berip, ony oryndaý kúshik kezinen úıretiledi. Negizi ıttiń qyzmet etý jasy 8 jyl. Odan keıin olar uıyqtatylady. Arnaıy baǵdarlama negizinde kınolog mamandar ortalyqqa kelgen soń oqyp, emtıhan tapsyrǵan soń kýrsty aıaqtaǵany týraly sertıfıkat tapsyrylady»,- dedi Kınologııa ortalyǵy basshysynyń orynbasary Aqan Tursynbaev.
Onyń aıtýynsha, jyl basynan beri jergilikti kınologtardyń ıisshil ıtteri 50 -den astam kontrafaktilik ónimniń jolyn kesti. Onyń ishinde valıýta, esirtki zattary, jarylǵysh zattar, joǵalyp bara jatqan janýarlardyń múıizderi nemese terileri bar.
Jeńimpazdardyń biri Nurbol Sabanov «Barbıdi» kúshik kezinen úıretip keledi. Bul - kapıtannyń baptap jatqan úshinshi ıti. Iisshil ıt 3 jyl ishinde 11 ret nátıje kórsetken.
«Barbı» marıhýana, amfetamın, geroın, gashısh tasymaldaǵan qylmyskerlerdi ustaýǵa kómektesken.
Jazy ystyq Mańǵystaý oblysynda «Barbı» qaýipti jaǵdaıda jumys jasaýdan taıynǵan emes.
«Biz kóbine kemelerdi qaraımyz. Mańǵystaý oblysynyń 50 gradýs ystyǵynda kúıip turǵan kemeden esirtki izdeý oǵan úlken qaýip týǵyzady. Kemege miný úshin jalǵanǵan traptan qulap kete me degen qaýip te bolady. Biraq, shamamyz kelgenshe ystyq ótkizbeýge tyrysamyz», - dedi Nurbol Sabanov.
Aıta ketý kerek, Almatydaǵy QR Qarjy mınıstri Memlekettik Kirister departamentiniń Kınologııalyq ortalyǵynda osy ýaqytqa deıin 860 komanda oqyp shyqty. Onyń ishinde Monǵolııa, Tájikstan, Túrkmenstan, Ózbekstan elderinen kelgen kınologtar da tálim alyp shyqty.
