Almatyda ıisshil ıt úıinen ketip qalǵan jasóspirimdi tapty
ALMATY. QazAqparat - Almatyda qyzmettik ıt joǵalǵan jasóspirimniń izine tústi, dep habarlaıdy QazAqparat tilshisi.
Almaty qalalyq Polıtsııa departamentiniń málimetinshe, 14 jastaǵy A. esimdi oqýshynyń joǵalyp ketkeni týraly habar 30 sáýir kúni tústi.
Balanyń ata-anasynyń aıtýynsha, jasóspirim bir kún buryn janjal kezinde úıinen shyǵyp ketip, qaıta oralmaǵan.
«Tolyqqandy otbasy. Belgili bolǵandaı, anasy ulyna eskertý jasaǵan, ol soǵan renjip, úıden qashyp ketken. Ata-anasy balasyn óz betimen tabýǵa tyrysqan eken. Alaıda nátıjesiz bolǵan. Kelesi kúni olar polıtsııadan kómek surady. Іzdeýdi bizdiń bóliminiń ıývenaldy polıtsııasynyń qyzmetkerleri, ýchaskelik ınspektorlar, eriktiler jáne Polıtsııa departamentiniń tergeý-jedel toby uıymdastyrdy», – dedi Jetisý aýdandyq Polıtsııa basqarmasynyń bastyǵy Darhan Musanov.
Spıkerdiń aıtýynsha, jasósipirimdi izdeý tobynyń quramynda «Esma» atty izdeý ıti boldy.
«It úıden aıaldamaǵa deıin alyp bardy. Kýágerlermen áńgimelesý arqyly oqýshynyń avtobýsqa otyrǵandyǵy anyqtaldy. Ony sońǵy ret «Qalqaman» yqshamaýdanyndaǵy kólik bólshekter bazarynda kórgen. Osy kezde Esma qaıtadan izge tústi. It balalar oıyn alańyna alyp bardy. Dál sol jerden joǵalǵan bala aman-esen tabyldy, – dedi Almaty qalalyq PD kınologııalyq qyzmet ortalyǵynyń kınolog-ınspektory Medet Jumaǵalı.
