Almatyda ІІІ medıa-quryltaı ótedi
ALMATY. Qazannyń 12-si. QazAqparat /Erbol Turymbetov/ - Almatyda qarashanyń 12-si kúni «Qazaqstandyq BAQ: toqyraý, stagnatsııa álde ósý? Básekege qabiletti BAQ - básekege qabiletti el» taqyrybynda dástúrli ІІІ medıa-quryltaı ótedi.
Medıa-quryltaı - jyl saıynǵy Qazaqstan baspasóz klýbynyń uıymdastyrýymen ótetin medıa-naryqtyń damýy máselelerin talqylaıtyn iri halyqaralyq konferentsııa bolyp tabylady. Bıylǵy otyrys medıa-salanyń strategııalyq damýyna arnalyp otyr.
Sońǵy 2 jylda medıa-quryltaı óziniń qajettiligi, tıimdiligi jáne ótkirliligin dáleldep otyr. Onda medıa-ındýstrııa kóshbasshylary, bas redaktorlar men jýrnalıster, sheneýnikter, sarapshylar jáne ınvestorlar bul salanyń damýyna qatysty suraqtarǵa jaýap izdeıdi. BAQ sektoryndaǵy tabysty strategııalarynyń tájirıbelerimen almasady. Sonymen qatar, kúrdeli máseleler men olardy sheshý joldaryn qarastyrady. Osy saladaǵy medıa uıymdardyń kásipqoılylyǵy men kúsheıýine baılanysty bilimderin tolyqtyratyn bolady.
Medıa-quryltaı ótken 2 jyldaǵy qatysýshylar men sarapshylardyń elimizdegi ózekti máselelerdi kóterýine qatysty joǵarǵy baǵalaryn alyp úlgerdi. Ótken jyly konferentsııaǵa elimizdiń barlyq aımaqtarynan 100-den astam adam qatysyp, shara Reseı men Qazaqstan BAQ-tarynda keńinen jarııalanǵan bolatyn.
Bıyl da aımaqtyq BAQ ókilderin qosa alǵanda 150-deı qatysýshy keledi dep kútilýde. Konferentsııaǵa shaqyrylǵandar arasynda reseılik jáne sheteldik medıany damytý sheńberindegi mamandar bar.
