Almatyda III Halyqaralyq opera jáne balet óneriniń festıvali bastalady
ASTANA. 19 maýsym. QazAqparat - Abaı atyndaǵy qazaq memlekettik akademııalyq opera jáne balet teatry men Qazaqstan mýzyka qaıratkerleriniń odaǵy Qazkommertsbanktiń qoldaýymen erteń Almaty qalasyndaǵy Mádenıet jylyna arnalǵan III Halyqaralyq opera jáne balet óneriniń festıvali bastalady.
Festıval baǵdarlamasyna teatr repertýaryndaǵy asa tanymal eki opera endi. Bul - Djakoma Pýchchınıdiń «Bogema» men «Turandot hanshaıym» operalary. Sondaı-aq balet álemi Petr Chaıkovskııdiń «Aqqý kóli» jáne Borıs Eıfmannyń «Anna Karenına» baletterin usynbaq.
20 maýsymnan bastap bes kún qatarynan teatr sahnasynda qazaqstandyq artıstermen qatar almatylyqtar men Almaty qonaqtary úshin álemdik opera jáne balet juldyzdary: Marko Balderı (Italııa), Kovent-Garden Ulybrıtanııa teatrynyń prıma-balerınasy Roberta Markes Barbosa (Ulybrıtanııa), Aǵylshyn ulttyq baletiniń premeri- Arıonel Pegýero Vargac (Ulybrıtanııa), tenor - Antonıno Interızano (Italııa), soprano - Krıstına Pıperno (Italııa), tenor - Von Iong Lı (Ońtústik Koreıa), soprano - Iong Mı Kım (Ońtústik Koreıa) óner kórsetpek.
Festıvalge sheteldik qonaqtarmen qatar qazaqstandyq opera jáne balet juldyzdary: QR Halyq artısi, memlekettik syılyqtardyń laýreaty Nurjamal Úsenbaeva, QR eńbek sińirgen qaıratkerleri: Jamılıa Baspaqova, Sáýle Rahmedova, Bolat Jomartov, Beıimbet Kojabaev, opera ánshileri: Andreı Tregýbenko, Serik Aýqatov jáne basqalar, sonymen qatar balettiń jetekshi oryndaýshylary: Aınur Ábilǵazına, Janel Túkeeva, Farhad Býrıev, Daýren Jeńis pen Nurlan Konoqbaevtar qatysady.
«Almaty - búginde óner men mádenıettiń, bilim men ǵylymnyń órkenıetti ortalyǵyna aınaldy. Talǵamy bıik kórermenderi, jańa zamanǵa laıyqty kórnekti ǵımarattary bar ásem qalamyzda halyqaralyq deńgeıdegi teatr festıvaldary men kıno, mýzyka, óner konkýrstarynyń jıi ótetini zańdylyq, - dedi quttyqtaý sózinde qala ákimi Ahmetjan Esimov óz sózinde. - Klassıkalyq opera men balettiń álemdik juldyzdary otandyq teatr artısterimen birge qazaq sahnasynda óner kórsetetinin maqtanysh tutamyz».
«Halyqaralyq opera jáne balet óneriniń festıvali jyl saıyn óz kórermenderin tosyn syılarmen tańqaldyryp keledi. Ónersúıer qaýymnyń dástúrli merekeni asyǵa kútetininiń máni de osynda dep bilem. Festıvaldiń qazaqstandyq jas oryndaýshylardyń shyǵarmashylyq turǵydan odan ári ósip, opera jáne balet óneriniń qalyń qaýym arasynda nasıhattalýyna sep bolýy da atap ótýge turarlyq, mańyzdy jaıt», - dedi Qazkommertsbanktiń basqarma tóraıymy Nına Júsipova.
