Almatyda ІІ Halyqaralyq «Four E» eko-etnofestıvali ótedi
ALMATY. 9 tamyz. QazAqparat - Almaty mańynda 17-19 tamyzda ІІ Halyqaralyq «Four E» ekologııalyq-etnıkalyq festıvali bolady.
Ony Snoýbord jáne ekstremaldy sport túrleri federatsııasy, Matıpatı jobasy, FUNK Kreatıvtik agenttigi birlesip uıymdastyryp otyr. Festıval óz táni men rýhyn damytýǵa qyzyǵýshylyq bildiretin shyǵarashylyq tulǵalary, mýzykanttar, sýretshiler, dızaınerler, sáýletshiler, qolónershiler, saıahatshylar men salaýatty ómir salty boıynsha sarapshylardyń jáne ózge de qarapaıym azamattardyń basyn qosady. Byltyr bul sharaǵa 6 myńnan astam adam qatysqan bolatyn. Uıymdastyrýshylar bul joly qatysýshylardyń sany budan áldeqaıda kóp bolady dep josparlaýda.
Jalpy ekologııalyq-etnıkalyq festıval baǵdarlamasy dástúr boıynsha 4 tústi aımaqqa bólingen. Qyzǵylt sarysy - etnıkalyq mýzykaǵa, jasyly - avtorlyq dızaın boıynsha sheberlik dáristerine, kúlgini - tán men rýhty damytýshy mamandarǵa, qyzǵylty - balalardyń bilim berý ortalyǵyna berilmek. Onda bıyl Reseıden Sergeı Chık pen «Ivolga» toby, Qyrǵyzstannan Alevtına Batalova, Ýkraınadan «OdnoNo» jobasy al Qazaqstannan «HaPaNaSaSa» toby óner kórsetkeli otyr.
