Almatyda ІI halyqaralyq Farabı forýmy ótedi
Forým Ábý Nasyr ál‐Farabıdiń 1145 jyldyǵyna, Qazaq handyǵynyń 550 jyldyǵyna, Qazaqstan halqy Assambleıasy jylyna, «Almaty ıslam áleminiń astanasy-2015» jylyna arnalyp otyr.
Aıtýly sharany ál-Farabı atyndaǵy Qazaq ulttyq ýnıversıteti, Qazaqstan Respýblıkasy Ulttyq ǵylym akademııasy, Fılosofııa, saıasattaný jáne dintaný ınstıtýty, Qazaqstannyń fılosofııa kongresi uıymdastyrady, dep habarlanǵan QazUÝ-iniń saıtynda.
Forým jumysynyń negizgi baǵyttary Shyǵys pen Batys toǵysyndaǵy ál-Farabı fılosofııasy, ál-Farabı jáne Islam mádenıeti, ál‐Farabıdiń ǵylymdardy jikteýi jáne qazirgi jaratylystanýdyń ózekti máseleleri bolyp tabylady. Sondaı-aq HHІ ǵasyrdyń ınnovatsııalyq áleýeti jáne turaqty damý perspektıvalary, tehnogendi órkenıet shyndyǵyndaǵy áleýmettik ǵylymdar, Qazaqstannyń mádenı jáne áleýmettik‐saıası damýynyń ózekti máseleleri jastar kózqarasy turǵysynan qarastyrylady. «Al-Farabi university Smart city - ınnovatsııalyq ýnıversıtettiń modeli» pikirsaıys alańynda qatysýshylar óz oılaryn ortaǵa sala alady.
Farabı forýmy aıasynda Ońtústik Qazaqstannyń «Altyn saqınasy» mádenı-etnografııalyq týryn uıymdastyrý josparlanǵan. Eki kúndik týr baǵdarlamasynda Qarahan, Babajy qatyn men Aısha Bıbi kesenelerin (Taraz qalasy), Arystan bab kesenesi, Otyrar ortaǵasyrlyq qala orny, Qoja Ahmet ıAsaýı kesenesi, Qylýet jerasty meshiti, Rábııa Sultanbegim kesenesi, Túrkistan tarıhı murajaıy (Ońtústik Qazaqstan oblysy) syndy tarıhı nysandarǵa barý kózdelgen.
