Almatyda ІІ Amerıka-Qazaqstan birlesken kınofestıvali ótedi

Festıvaldi AQSh-tyń Qazaqstandaǵy Elshiligi men qazaqstandyq «Eýrazııa fılm prodakshn» kompanııasy birlese qolǵa alyp otyr. Sharany AQSh Elshiligi qarjylandyratyn bolady. Sonymen qatar, SULPAK kompanııasy demeýshilik jasap otyr. Mádenı sharaǵa áıgili amerıkandyq akter ári kınorejısser Djon Malkovıch pen prodıýser Maıkl Fıttsjerald qatysady.

«Men Maıkl Fıttsjeraldpen 2005 jylǵy І Kınofestıvalde tanysqan edim. Sol tanystyǵymyz keıin dostyqqa ulasyp, búgingideı úlken sharalardyń uıymdastyrylýyna serpin berdi. Burynǵy KSRO zamanynda bizdiń qazaq kıno óneri kóp kóleńkede qalyp keldi. Qazirgi ýaqytta osy amerıkalyq áriptesterimizben birlesip, úlken jetistikterge jetýdemiz. Búginde qazaq kıno óneri áldeqaıda damydy», dedi kınorejısser Ermek Shynarbaev.

Festıval barysynda «Elektrli tumanda» (prodıýserleri - Gúlnár Sársenova men Maıkl Fıttsjerald), «Úıge qaraı jol qaısy?» (prodıýseri Djon Malkovıch), «Kek» (rejısseri Ermek Shynarbaev), «Joǵarǵy qabattaǵy bıshi» (rejısseri Djon Malkovıch), «Rıplıdiń oıyny» (basty rólde - Djon Malkovıch), «Perishtege hattar» (prodıýserleri - Gúlnár Sársenova men Ermek Shynarbaev) fılmderi qoıylady.

«Uıymdastyrylyp otyrǵan bul shara elimizdegi 5-shi festıval bolyp tabylady. Bundaı sharalardyń turaqty ótkizilýi otandyq kınematografııanyń damýyna úlken serpin beredi. Sondyqtan, «Qazaqfılm» kınostýdııasy osy tektes barlyq sharalarǵa kómektesýge daıyn», dedi «Qazaqfılm» AQ Bas redaktory Dıdar Amantaı. Onyń aıtýynsha, shara aıasynda T. Júrgenov atyndaǵy Óner akademııasy stýdentterine Djon Malkovıch pen Maıkl Fıttsjeraldtiń sheberlik sabaqtary ótkiziledi.