Almatyda ıesiz qalǵan 13 sý nysany anyqtaldy
«Almatyda 153 sý nysany bar, onyń ishinde 109 sý aǵyny jáne 44 sý qoımasy. Olardyń jalpy uzyndyǵy – 586,2 shaqyrym. Sondaı-aq, qala aýmaǵyndaǵy sý obektilerinde 36 sý tartý nysany bar, onyń 13-i ıesiz, ony órt sóndirý jáne sýarý mashınalary úshin de paıdalanylady», - deıdi ekologııa jáne qorshaǵan ortany qorǵaý basqarmasy basshysy orynbasarynyń mindetin atqarýshy Sergeı Gerasımenko.
Sonymen qatar, ol kóktemgi kezeńde sý basý aımaqtarynyń kóbeıgenin atap ótti.
«Kóktemgi kezeńde sý basý aımaqtarynyń sany 102-ge deıin artty. Zertteý barysynda sý basý aımaǵynda 82 aýla, 90 ákimshilik ǵımarat, 48 saýda núktesi men óndiristik ǵımarattar, sondaı-aq saıabaq pen 50-den astam kóshe bar ekeni anyqtaldy», - dedi spıker.
Aıtýynsha, máseleni jedel sheshý úshin jyl sońyna deıin aryq jelilerin keńeıtý, kollektorlardy qaıta qurý jáne qalpyna keltirý josparlanǵan. Bul 56 sý basý aımaǵyn joıýǵa múmkindik beredi.
«Sonymen qosa, 2023 jyldyń sońyna deıin uzyndyǵy 376 shaqyrym aryq jelilerin jańartý jáne salý jobasy aıasynda qalǵan 46 sý basqan aımaqtyń máseleleri sheshilip, 67 shaqyrymdyq qurylys aıaqtalady. Jańa aryq jelileri de qamtamasyz etiledi. Búginde qalanyń batys bóliginde, uzyndyǵy 119 shaqyrymdy qalpyna keltirý jumystary bastalyp, shyǵys jáne ortalyq bólikte jumystardy bıylǵy kúzde bastaý josparlanyp otyr», - dedi ol.
Sondaı-aq, ol jasyl jelekti sýarýdyń keshendi shemasyn uıymdastyrý maqsatynda aryq jelilerine sý beretin 27 tartý qurylysyn qaıta jasaqtaý jáne salý boıynsha joba ázirlengenin jetkizdi.
