Almatyda ıesiz elektr jelileri qala menshigine ótedi
ALMATY. QazAqparat – Almaty ákiminiń tapsyrmasymen qaladaǵy ıesiz jatqan elektr jelileri qazan aıynyń aıaǵyna deıin qalanyń ıeligine beriledi, dep habarlaıdy QazAqparat tilshisi.
Barlyq ıesiz jatqan jeliler qala ákimdiginiń balansyna beriledi. Bul apatty jaǵdaılar týyndaǵan jaǵdaıda jyldamyraq áreket etip, kommýnaldyq qyzmetterge tarıfti azaıtýǵa septigin tıgizbek.
Bul jaıynda qalalyq Energetıkalyq tıimdilik jine ınfraqurylymdyq damý basqarmasynyń basshysy Áset Masabaev onlaın brıfıng barysynda aıtty. Onyń aıtýynsha, osy ýaqytqa deıin 700 jýyq nysan qabyldanǵan.
Iesiz jatqan jelilerdi qala balansyna berý 2 kezeńmen júrgizilgen.
«Byltyr qarasha aıyna deıin 544 oryn boıynsha sot sheshimi shyqqan. Bul 156 qosalqy stansa men 746 km elektr jelisi desek bolady. Bıyl jumys naýryz aıyna deıin jalǵasty. Aýdandyq ákimdiktermen birge taǵy 450 oryndy tizimge aldyq. Bostandyq aýdanynan basqa aýdandardyń ıesiz jelileri boıynsha sot sheshimderi bar. Tek Bostandyq aýdanynda jumys júrgizilip jatyr», - dedi Áset Masabaev.
Onyń aıtýynsha, Bostandyq aýdanynda 19 transformatorlyq qosalqy stansa men 63 elektr jelisi bar. Qazir tirkeýge alý rásimi jasalyp jatyr.
«Qazir bul jelilerdiń barlyǵy Ádilet organdarynda tirkeýge alynyp jatyr. Odan keıin «Alataý Jaryq» kompanııasynyń balansyna qabyldanady. Osy aptada qala ákiminiń ıesiz jelilerdi «Alataý jaryq kompanııasy» balansyna berý týraly qaýlysy shyǵady. Odan keıin derbes shottardy zańdastyrý bastalady», - dedi Á.Masabaev.
