Almatyda ıesin tapanshamen atyp kóligin urlap ketken qylmyskerler ustaldy
ALMATY. Shildeniń 9-y. QazAqparat /Erbol Azanbek/ -Almatylyq polıtsııa qyzmetkerleri qaraqshylyq shabýyl jasaǵan qylmystyq topty quryqtady,
dep habarlaıdy qalalyq ishki ister departamentiniń baspasóz qyzmeti.
Maýsymnyń 27-sine qaraǵan túni Bostandyq aýdanyndaǵy kópqabatty úı aýlalarynyń birinde eki qylmysker «Toıota Lend Krýzer» kóliginiń ıesin rezeńke oqpen atylatyn tapanshamen atyp, kólikti urlap ketken.
«Jábirlenýshi shabýyl jasaǵandardyń túrin kóre almaǵan. Tek olardyń qara kıingenin aıtyp berdi. Jedel izdestirý sharalary barysynda djıpti arzan baǵaǵa satpaq bolǵan jas jigitter anyqtaldy. Tekserý barysynda anyqtalǵandaı bul urlanǵan kólik bolyp shyqty» deıdi qalalyq ІІD-niń jol polıtsııasy basqarmasy bastyǵynyń orynbasary, polkovnık Muhtar Túsipov.
Onyń aıtýynsha, arnaıy operatsııa nátıjesinde Ońtústik Qazaqstan oblysynyń 4 turǵyny ustalǵan. Onyń ekeýi tehnıkalyq qyzmet kórsetý ortalyǵynda jumys isteıtin bolyp shyqty. Anyqtalǵandaı urlanǵan kólikti olar ózderiniń kólik jóndeý ortalyqtarynda jasyryp kelgen. Qylmysty jasaý da osy ekeýdiń bastamasymen júzege asyrylǵan bolyp shyqty. Qalǵan ekeýiniń biri jumyssyz, bireýi stýdent. Olar óz qylmystaryn moıyndaǵan. Qazirgi kezde olardyń basqa qylmystarǵa qatystylyǵy anyqtalýda.
«Bul kólik jóndeý ortalyqtary qyzmetkerleriniń birinshi qylmysy emes. Osyǵan oraı almatylyqtar men qala qonaqtaryna asa saq bolýdy eskertemiz. Kólikterin qaraýsyz nemese TJO qyzmetkerlerine berýge bolmaıtynyn aıtyp ótkim keledi. Bundaı qaýipsizdikti kólik jýý oryndarynda da saqtaý qajet. Óıtkeni buǵan deıin kólik jýý oryndary jumysshylarynyń da kólik urlaǵan faktileri kezdesti» deıdi M.Túsipov.
