Almatyda I.V. Panfılovty eske alý kúni ótti
Y. Qarashanyń 18-i. QazAqparat /Ádilet Musahaev/ - Almatyda áıgili general Ivan Vasılevıch Panfılovtyń eskertkishine gúl shoqtary qoıylyp, ony eske alý kúni ótti,
dep habarlaıdy QazAqparat.
Dál osy kúni 1941 jyly 18 qarashada ataqty dıvızııa komandıri Moskvany qorǵaý barysynda qaza tapqan edi.
«316 atqyshtar dıvızııasy jáne 28 panfılovshy-qaharmandar orta jastan joǵary býyn úshin erlik pen batyrlyqtyń nyshany ekeni belgili. Biraq sońǵy urpaqqa, jastarǵa Uly Otan soǵysy kezinde jasalǵan erlikter jaıynda kóp aıtyla bermeıdi, tipten olar bul soǵys jaıynda umytyp barady desek te bolady. Sol sebepti elimizdegi jastardyń yqylasyn Qazaqstannyń ekinshi dúnıejúzilik soǵys tusyndaǵy tarıhyna aýdartyp, sol kezeńdegi derekter men oqıǵalardan keńirek maǵlumat alsa, ata-babalarymyzdyń surapyl shaıqasta kórsetken erligin árqashan esten shyǵarmasa degen maqsatta osy sharany uıymdastyryp otyrmyz», deıdi KF «Aqparattyq áreket» uıymynyń tóraǵasy Mıhaıl Tıýnın.
«Ótken kúndi eskermeı, bolashaqqa qadam basý múmkin emes. 1941-1945 jyldary Keńes úkimeti óte aýyr, zulmat jyldardy bastan ótkerdi. Fashısterge qarsy kúreste jaýyngerlerdi alǵa bastap, aıanbaı erlik kórsetken jandardyń biri osy Ivan Vasılevıch Panfılov bolatyn. Ol qysqa merzimniń ishinde dıvızııa jınaqtap soǵysqa attandy. Soǵystyń alǵashqy aýyr kúnderi ol aldyńǵy shepte erlik kórsete bildi jáne sol jerde qaza tapty. Sondyqtan biz ony árqashan este saqtap, onyń jasaǵan erligi jaıynda jastarǵa kóptep aıtýymyz kerek», deıdi Kım Serikbaev, QR eńbegi sińgen qaıratker, polkovnık.
Jıynǵa Uly Otan soǵysy ardagerleri, mektep oqýshylary, stýdentter jáne áskerı oqý oryndarynyń kýrsanttary qatysty.
Shara KF «Aqparattyq áreket», «Túrkistandyq atqyshtar» áskerı-tarıhı klýbynyń uıymdastyrýymen jáne Almaty qalasy ákimdiginiń qoldaýymen ótip otyr.
