Almatyda І Respýblıkalyq muǵalimder festıvali ótedi
ALMATY. 5 qarasha. QazAqparat /Názıra Eleýhan/ - Almatyda qarashanyń 9-y kúni «Bóbek» ulttyq ǵylymı-tájirıbelik, bilim berý jáne saýyqtyrý ortalyǵynda «Ózin-ózi taný» páni boıynsha tuńǵysh ret «Ómirlik boryshym ustaz bolý» atty muǵalimderdiń І respýblıkalyq festıvali ótedi.
Adamnyń úılesimdi damýy ınstıtýtynyń jetekshiligimen alǵash ret uıymdastyrylatyn respýblıkalyq deńgeıdegi festıvalge elimizdiń aımaqtarynan «Ózin-ózi taný» pániniń eń úzdik degen 50-ge jýyq muǵalimderi qatysady.
Basqosýda muǵalimder óskeleń urpaqtyń boıynda rýhanı-adamgershilik qundylyqtaryn baıytý, ári damytý joldaryn talqylaıtyn bolady.
Uıymdastyrýshylardyń aıtýynsha, sharanyń basty maqsaty - «Ózin-ózi taný» pánin keńinen halyq arasynda tanytý, jasóspirimdermen birlesip jumys isteý aıasynda jańa pedagogıkalyq ádistemelerdi qoldaný, jeke jáne ujymdyq jumystar arqyly balanyń shyǵarmashylyǵyn damytý, sondaı-aq, olarǵa qoldaý kórsetý maqsatynda memlekettik jáne qoǵamdyq uıymdarmen birlesip jumys isteý máselelerin talqylaý bolyp tabylady.
Shara aıasynda 2010 jyly Qazaqstannyń barlyq deńgeıdegi oqý júıesine engizilgen «Ózin-ózi taný» pániniń oqytylýy týraly 1 jyldyq esebi beriledi. Bunymen qatar, elimizdiń bilikti mamandary arasynda sheberlik-dárister, trenıngter, tanystyrylymdar men ashyq sabaqtar uıymdastyrylatyn bolady.
