Almatyda I qazaqstandyq «Er Tóstik» anımatsııalyq fılmder festıvali bastaldy
ATY. 13 maýsym. QazAqparat /Názıra Eleýhan/ - Búgin Almatyda elimizde tuńǵysh ret uıymdastyrylyp otyrǵan I qazaqstandyq «Er Tóstik» anımatsııalyq fılmder festıvaliniń resmı ashylý saltanaty bolyp ótti.
Atalmysh sharanyń uıymdastyrýshysy - Sháken Aımanov atyndaǵy «Qazaqfılm» AQ-y.
Festıvalge «Qazaqfılm» kınostýdııasynyń ókilderimen qatar, Shymkent, Kókshetaý, Astana, Almaty jáne taǵy da basqa qalalardan kelgen anımatorlar, rejısserler, sýretshiler, anımatsııalyq kıno birlestikteriniń ókilderi, móltek fılmderdi jasaıtyn jekemenshik kınostýdııalardyń basshylary qatysýda.
«Festıvaldi ótkizýdegi negizgi maqsatymyz - Qazaqstandaǵy anımatsııalyq mýltfılmder aıasynda qordalanyp qalǵan máselelerdi talqylaý, qaraý, sheshý bolyp tabylady»,-dedi Sháken Aımanov atyndaǵy «Qazaqfılm» AQ-nyń prezıdenti Ermek Amanshaev.
Úsh kún boıy «Sınema Taýers» kınoteatry men «Qazaqfılm» kınostýdııasynda qazaqstandyq anımatsııalyq fılmderiniń kórsetilimi, anımatsııa salasyndaǵy tanymal mamandardyń sheberlik dáristeri, kishkentaı búldirshinder úshin Qalalyq qýyrshaqtar teatrynyń qoıylymdary, sonymen qatar, «Qazaq anımatsııasynyń damýy men bolashaǵy» degen taqyrypta dóńgelek ústel otyrystary ótedi. Dóńgelek ústelde anımatsııalyq fılmderdiń bolashaǵy men búgingi jaǵdaıy talqylanatyn bolady.
Búgin «Qazaqfılm» kınostýdııasy aýmaǵynda qalalyq balabaqshalar men balalar úılerinen arnaıy shaqyrylǵan 150 bala úshin Qýyrshaq teatrynyń qoıylymdary ótti. BAQ ókilderi úshin «Qazaqfılm» kınostýdııasyndaǵy anımatsııalyq kıno birlestiginiń jumysy men alǵashqy tolyqmetrajdy «Er Tóstik» anımatsııalyq jobasynyń jumys barysy tanystyryldy. Sonymen qatar, birneshe anımatsııalyq fılmderdiń kórsetilimi ótkizildi.
«Qazaqfılm» kınostýdııasynyń anımatsııalyq kıno birlestiginiń jetekshisi Jáken Dánenovtyń aıtýynsha, «Er Tóstik» móltek fılmi kınostýdııanyń pılottyq jobasy bolyp tabylady. «Bul tuńǵysh ret qolǵa alynyp otyrǵan tolyqmetrajdy mýltfılm. Týyndy 60 mınýttan turady. Onymen 10-15 shaqty anımatorlar jumys isteýde. Alǵashynda reseılik mamandardy tartqan edik, ulttyq naqysh joǵalǵandyqtan, qazir ózimiz jasaýdamyz. Mýltfılmdi osydan eki jyl buryn qolǵa aldyq, endi alǵashqy tolyqmetrajdy mýltfılmdi jyldyń aıaǵyna deıin bitirýdi josparlap otyrmyz. Fılm barlyq talaptarǵa saı, zamanaýı úlgide, sońǵy tehnologııalarmen jasalynýda»,-dedi ol.
Erteń «Sınema Taýers» kınoteatrynda kishkentaı búldirshinder úshin «Qazaqfılm» kınostýdııasynda sońǵy úsh jylda shyqqan móltek fılmderiniń kórsetilimderi bolady. Kirý tegin.
