Almatyda I halyqaralyq Qazaq-Brıtan akademııasy quryltaıshylarynyń alǵashqy keńesi ótedi
ASTANA. Jeltoqsannyń 7-si. QazAqparat - Jeltoqsannyń 9-10-y aralyǵynda Almatyda Qazaqstan Respýblıkasynyń Mádenıet jáne aqparat mınıstrliginiń, Mádenıet komıtetiniń jáne Mádenı saıasat jáne ónertaný ınstıtýtynyń uıymdastyrýymen I halyqaralyq Qazaq-Brıtan akademııasy quryltaıshylarynyń alǵashqy keńesi ótedi,
dep habarlaıdy QazAqparat uıymdastyrý komıtetine silteme jasap.
Aǵymdaǵy jyly qyrkúıektiń 1-8-i aralyǵynda qazaqstandyq bir top ǵalymdar Kembrıdj ýnıversıtetinde ótken Qazaqstannyń tarıhı jáne qazirgi zamanǵy aspektilerine arnalǵan órkenıetter dıalogy kontekstindegi «Shyǵys-Batys» atty halyqaralyq konferentsııa jumysyna qatysyp qaıtqan bolatyn. Ótkizilgen sharalar negizinde Ulybrıtanııa Koroldigi janyndaǵy Azııa qoǵamymen birlesip, Almaty qalasynda Orta Azııa ǵalymdarynyń qyzmetin úılestirýshi retinde Qazaq-Brıtan akademııasyn ashý týraly kelisimge qol jetkizilgen edi. Akademııanyń qurylýy jáne onyń qyzmeti Qazaqstannyń jalpyeýropalyq jáne álemdik akademııalyq jáne mádenı qaýymdastyq keńistigine yqpaldasý, elimizdiń shetelge tanylýyna jáne alǵa jyljýyna, qazaqstandyq ıntellektýaldyq potentsıalynyń qalyptasýy men nasıhattalýyna yqpal etetin bolady.
Atalǵan is-sharany ótkizýdiń negizgi maqsattary men mindetteri: «Mádenı mura» memlekettik baǵdarlamasyn halyqaralyq dárejede nasıhattaý, qazirgi órkenıetti zamanǵa laıyqty ortaq keńistiktegi konstrýktıvti dıalog qalyptastyrý, Qazaqstannyń Álemdik órkenıetter dıalogy qaýymdastyǵyndaǵy ózindik orny men mańyzyn anyqtaý, álemdik órkenıet prıntsıpine negizdelgen ıdeıalyq-dúnıetanymdyq kontseptsııa jasap, mańyzdy qundylyqtarǵa oraı taraptarmen shyǵarmashylyq qarym-qatynasta bolý, 2010 jylǵy Qazaqstannyń EQYU-daǵy tóraǵalyǵy aýqymynda barlyq mádenı jáne áleýmettik-gýmanıtarlyq júıede dıalogtyq tuǵyrnama qalyptastyrý.
Alqaly jıynǵa belgili memleket jáne mádenıet qaıratkerleri, Qazaqstan men Ulybrıtanııanyń ǵylymı-shyǵarmashylyqpen aınalysatyn zııaly qaýym ókilderi qatysady.
