Almatyda І halyqaralyq «ALMALY.KZ» balalar óner festıvali ótedi
ASTANA. 1 aqpan. QazAqparat - 2013 jyldyń 22-28 naýryz kúnderi Almatyda І halyqaralyq «ALMALY.KZ» balalar óner festıvali ótedi. Bul týraly festıvaldi uıymdastyrýshylardyń biri - «Tańsári» prodıýserlik ortalyǵynan habarlady.
Sharaǵa Qazaqstannyń, Chehııanyń, Italııanyń, Latvııanyń, Grýzııanyń jáne Reseıdiń kórnekti mádenıet qaıratkerleri shaqyrylyp otyr.
Festıvaldiń ashylýy 22 naýryzda «Astana» alańynda ótedi. Konkýrstyq saıystar Jambyl atyndaǵy Qazaq memlekettik fılarmonııasynyń kontsert zalynda bolady.
Konkýrstyq baǵdarlamasynda vokal, horeografııa, teatr, parodııa, sán teatry, kishkentaı arýlar, «Júz sekýndta tańǵaldyr» biregeı atalymdary bar.
Konkýrsqa álemniń ártúrli elderinen 5 jastan 17 jasqa deıingi balalar men jasóspirimder qatyspaq.
Festıvaldi «Tańsári» prodıýserlik ortalyǵy men Almaty qalasynyń ákimdigi uıymdastyrǵaly otyr.
Óner jarysynyń maqsaty - jas talanttardy anyqtap, balalardyń adamgershil, mádenı jáne shyǵarmashylyq jetistikterin damytý bolmaq.
