Almatyda Hýseın Ámir-Temirdiń rejısserligimen «Eńlik-Kebek» tragedııasy qaıta sahnalandy

Qoıýshy-rejısseri - Qazaqstannyń eńbek sińirgen qaıratkeri Hýseın Ámir-Temir, qoıýshy sýretshisi Murat Saparov, kompozıtory KSRO Halyq ártisi Ǵazıza Jubanova men Alıbı Mambetov. Ondaǵy basty keıipkerlerdi Azamat Surapbaı (Kebek), Záýre Kópjasarova (Eńlik), Jandarbek Sadyrbaev (Esen), Aıdos Bektemirov (Keńgirbaı), Eljan Turysov (Japal) jáne taǵy basqalar somdady.

Muhtar Áýezov bul qoıylymdy Semeı qalalyq muǵalimder semınarııasynda oqyp júrip Shákárim Qudaıberdiulynyń «Jolsyz jaza» dastanynyń negizinde jazǵan bolatyn. Ol alǵash ret Abaıdyń qyzy Kenje men Áıgerimniń tirkestirip tikken kıiz úıinde 1917 jyly maýsym aıynda Oıqudyq degen jerde avtordyń rejısserligimen sahnaǵa shyǵaryldy. Tobyqty men naıman arasyndaǵy jesir daýyn arqaý etken bul qoıylym odan keıin 1921 jyly mamyrda «Es-aımaq» trýppasynyń sahnasynda Júsipbek Aımaýytovtyń rejısserligimen qoıyldy. Al 1922 jyly Orynborda bul pesa kitap bop basylyp, túrli trýppalar men kórkem úıirmelerdiń repertýarynan turaqty oryn aldy. Sondyqtan 1926 jyly Qyzylordada qurylǵan Qazaq drama teatry óz shymyldyǵyn Serke Qojamqulovtyń rejısserligimen qoıylǵan «Eńlik-Kebekpen» ashty. Atalmysh qoıylymdy bul teatrdyń sahnasynda odan keıin 1933 jyly M. Nasonov, 1944 jyly A. Toqpanov jáne 1957 jyly M. Goldblot pen Q. Qýanyshbaev qaıta sahnalaǵan bolatyn.