Almatyda horeografııalyq oqý oryndarynyń ІІІ halyqaralyq baıqaýy óz máresine jetti

qurmetine arnalǵan jas balet ártisteriniń ІІІ halyqaralyq «Órleý» baıqaýy óz máresine jetip, jeńimpazdary anyqtaldy.

Esterińizge sala keteıik, «Órleý» baıqaýy  QR Tuńǵysh Prezıdentiniń qory men A.V. Seleznev atyndaǵy  horeografııa ýchılışesiniń uıymdastyrýymen jáne qala ákimdiginiń qoldaýymen 2010 jyldan beri ótkizilip keledi. Sharanyń maqsaty -  ulttyq horeografııa salasynyń bilimin, óneri men mádenıetiniń dárejesin kóterý, klassıkalyq, halyq jáne zamanaýı bılerdiń oryndaýshylyq sheberlikterin jetildirý, halyqaralyq shyǵarmashylyq yntymaqtastyqty  damytý bolyp tabylady.

Osymen úshinshi ret ótkizilgen bı baıqaýyna Qazaqstan, Reseı, Qyrǵyzstan,  Ózbekstan jáne Túrik  eliniń  horeografııa ýchılışelerinen kelgen 100-den asa oqýshylary qatysty. Olar úsh kún boıy klassıkalyq, halyqtyq-sahnalyq bı túrleri boıynsha synǵa tústi. Baıqaýǵa qatysýshy bıshilerdiń ónerlerin  álemdik balettiń ataqty qaıratkerleri, bıshi, baletmeısterleri, horeografııalyq oqý mekemeleriniń pedagog-horeograftary baǵalady.

Klassıkalyq bı túri boıynsha  Bas júlde - Gran-prıdi qazaqstandyq jas balet bıshileri - Ásııa Dıqambaeva men Baýyrjan Boranbaev (úlken top) jeńip aldy. Birinshi oryndy - Ánel Esqalıeva,  Bostan  Qojabekov (Qazaqstan) pen   Arýtıýn Arakelıan (Reseı), ekinshi oryndy da qazaqstandyq  Ekaterına Volkova men Arhat Áshirbek, úshinshi orynǵa - reseılik Kanna Kıtsýnaı men ózbekstandyq  Radıon Isıanov jáne  qazaqstandyq Ǵazız Rysqulov ıe boldy.  Ortańǵy top boıynsha  І oryndy - qazaqstandyq  Dıana Batyrova  men Aıdar Toqtar jeńip alsa, kishi top boıynsha aldyńǵy І oryndardy  elimizdiń jas balet bıshileri Kýbanych Shamakeev pen Baqytgúl Ispanovalar ıelendi. 

Al, halyqtyq-sahnalyq bı túrinen Gran-prıge qazaqstandyq Aıdana Ámirhanova laıyq dep tanyldy. Bul bı túri boıynsha І oryndy qyzdar arasynda qazaqstandyq bıshiler Bahytnur Dúısembaeva men Halıdam Mahmýtova ózara bólisse, uldar arasynda І oryndy reseılik  Nıkolaı Maltsev jeńip aldy. Ekinshi oryndy reseılik bıshiler Margarıta Shepeleva men Gennadıı Mymrık,  qazaqstandyq bıshi Janbolat Ertaev pen  ózbekstandyq bıshi Sarvarbek  Mamanov ıelendi. Al úshinshi oryndar ózbekstandyq bıshi  Parı Mýllajanovaǵa, qazaqstandyq bıshiler Sergeı Son men  Vladımır Petrıge buıyrdy.

Marapattaý rásiminde ádil-qazylar alqasynyń tóraǵasy- QR halyq ártisi Bolat Aıýhanov jyldan-jylǵa ónerli bıshilerdiń sanymen qatar, kásibı sheberlikteriniń  artyp kele jatqandyǵyn atap ótti.

Baıqaýdyń jabylý rásimi eń úzdik jas balet ártisteriniń úzdik nómirlerinen  quralǵan gala-kontsertpen aıaqtaldy.