Almatyda horeografııalyq oqý oryndarynyń ІІІ halyqaralyq baıqaýy ótedi

Baıqaý Qazaqstannyń  horeografııalyq biliminiń damýyna zor úles qosqan, QR Eńbek sińirgen qaıratkeri Qarlyǵash Myrzahanovany (1956-2011) eske alý qurmetine arnalady. Bul týraly búgin Almatyda ótken arnaıy baspasóz máslıhatynda atalmysh sharany uıymdastyrýshylar málim etti.

Esterińizge sala keteıik, «Órleý» baıqaýy  QR Tuńǵysh Prezıdentiniń qory men A.V. Seleznev atyndaǵy  horeografııa ýchılışesiniń uıymdastyrýymen jáne qala ákimdiginiń qoldaýymen 2010 jyldan beri ótkizilip keledi. Sharanyń maqsaty -  ulttyq horeografııa salasynyń bilimin, óneri men mádenıetiniń dárejesin kóterý, klassıkalyq, halyq jáne zamanaýı bılerdiń oryndaýshylyq sheberlikterin jetildirý, halyqaralyq shyǵarmashylyq yntymaqtastyqty  damytý bolyp tabylady.

Osymen úshinshi ret ótkizilgeli otyrǵan bı baıqaýyna Qazaqstan, Reseı, Qyrǵyzstan,  Ózbekstan jáne Túrik  eliniń  horeografııa ýchıleşelerinen kelgen 100-den asa oqýshylary qatysatyn bolady. Olar úsh kún boıy klassıkalyq, halyqtyq-sahnalyq bı túrleri boıynsha synǵa túsedi. Baıqaýǵa qatysýshy bıshilerdiń  ónerlerin  álemdik balet óneriniń ataqty qaıratkerleri, bıshi, baletmeısterleri, horeografııalyq oqý mekemeleriniń pedagog-horeograftary baǵalaıtyn  bolady. Ádilqazylar alqasynyń tóraǵasy - QR halyq ártisi, ataqty bıshi Bolat Aıýhanov.

Eń úzdik jas balet ártisteriniń esimderi 30 naýryz kúni belgili bolady. Shara úzdik nómirlerden quralǵan Gala-kontsertpen aıaqtalmaq.

"Baıqaý Qazaqstannyń álemdik arenada básekege qabilettiligi men bedelin kóterýge, ulttyq halyqtyq jáne klassıkalyq bı dástúrin damytýǵa, qazaqstandyq jas bıshilerdiń oryndaýshylyq sheberlikterin arttyrýǵa, sondaı-aq jas bıshi juldyzdarymyzdy anyqtaýǵa yqpal etedi", - dedi baspasóz máslıhatynda QR halyq ártisi Bolat Aıýhanov. Onyń aıtýynsha, mundaı halyqaralyq shara eń aldymen qatysýshylarǵa ózara shyǵarmashylyq tájirıbe almasýǵa úlken múmkindik bermek.