Almatyda HQO-lar jumysyna qaıta kirisken kúni 12,5 myńnan asa qyzmet kórsetken

Bul týraly «Azamattarǵa arnalǵan úkimet» memlekettik korporatsııasy Almaty qalalyq fılıalynyń PR-menedjeri Jańyl Ápetova Facebook paraqshasynda jazdy.

Keshe Almaty qalasynyń halyqqa qyzmet kórsetý ortalyqtary jumysyn qaıta jandandyryp, jańa formatta qyzmet kórsete bastady.

«Azamattarǵa arnalǵan úkimet» memlekettik korporatsııasy koronavırýs pandemııasy qaýpiniń saqtalýyna baılanysty memlekettik qyzmetterdi kórsetýdiń jańa formatyn usynǵan bolatyn. Soǵan sáıkes azamattar HQO-dan tek «qaǵaz júzindegi» qyzmetter men onlaın túrde rásimdelgen qyzmetterdiń nátıjelerin ala alady.

25 mamyrda Almaty HQO-larynda tańǵy 8-den úlken kezek paıda boldy. Kezek kútken adamdardyń sońy ǵımarattyń syrtyna shyǵyp ketken.

«Alǵashqy jumys kúni qarbalasqa toly boldy. Eki aıdan beri memlekettik qyzmet alýǵa qatysty máseleleri jınaqtalyp qalǵan almatylyqtardyń keıbiri, HQO-nyń jańa formattaǵy jumysyn eskermeı, kezekti aldyn ala brondamaı kelgen. Olarǵa arnaıy mamandar bólinip, HQO aýlasynda smartfon arqyly bron jasaldy. Kópshiligi qujattarynyń merzimi ótip ketti dep asyǵyp kelgen», - dedi Jańyl Ápetova.

«Azamattarǵa arnalǵan úkimet» memlekettik korporatsııasynyń ókili merzimi ótken qujattar 10 shildege deıin jaramdy ekendigin eskertti. «Elektrondyq qyzmetterdi úıinde alý múmkindigi joq adamdarǵa, Almaty qalasynda 40-tan asa ózine ózi qyzmet kórsetý sektorlary uıymdastyrylǵan. Al, tsıfrlyq qyzmet alýdy meńgermegender úshin Almaly jáne Alataý aýdandarynda 2 tsıfrlyq HQO jumys istep jatyr. Munda mamandar onlaın qyzmet alýdy úıretedi. Jalpy, memlekettik qyzmetterdi usynýdyń qazirgi jańa ádisi, eń aldymen qyzmet alýshy úshin óte yńǵaıly», - delingen jazbada.

Alǵashqy jumys kúni Almaty HQO-larynda 12,5 myńnan asa memlekettik qyzmet kórsetildi. Olardyń 70%-dan astamy aldyn ala brondaý arqyly qamtamasyz etilgen. Qalǵandary sol jerde bron jasaǵan nemese operatorlardyń bosaǵanyn kútken.

Osylaısha, Almaty qalasyndaǵy 16 front-ofıs (onyń ekeýi tsıfrlyq HQO), 5 mamandandyrylǵan HQO, 2 Mıgratsııalyq qyzmet kórsetý ortalyǵynyń alǵashqy jumys kúninde 12542 adamǵa qyzmet kórsetilgen.

Front-ofısterge júgingen 7208 adamnyń 2558-i tólqujattary men jeke kýálikterin rásimdegen, 619 adam turǵylyqty jeri boıynsha tirkelgen. Onyń 475-i turaqty, 144-i ýaqytsha tirkelip, 48 adam turǵylyqty jerinen esepten shyqqan.

Mamandandyrylǵan HQO-larǵa júgingen 3589 adamnyń 3012-si kólik quraldaryn tirkeý jáne qaıta tirkeý, 577-si júrgizýshi kýáligin rásimdeý qyzmetteriniń nátıjelerin aldy.

Mıgratsııalyq HQO-larda sheteldik azamattarǵa 696 qyzmet kórsetilgen. Olardyń 496-sy - eńbekke ruqsat alý, 149-y - ýaqytsha tikeýge turý, 51-i JSN alý qyzmetterin paıdalanǵan.

Almaly jáne Alataý aýdandarynda ashylǵan tsıfrlyq qyzmet kórsetý ortalyǵyna 1050 adam kelip, elektrondyq qyzmetter alyp, onlaın qyzmet alý daǵdylaryna úırengen.

«Halyqqa qyzmet kórsetý ortalyǵyna kezek ýaqytyn egov.kz portaly, telegram-bot eGovKzBot2.0 nemese 1414 nómirine qońyraý shalý arqyly belgileý qajet. Eskeretin jáıt, HQO-ǵa qatań túrde belgilengen ýaqyt aralyǵynda barǵan jón. Sebebi bron ýaqyty ótip ketse, qaıta brondaý rásimin jasaý kerek bolady. Sonymen qatar bron barysynda tirkelgen JSN ıesi ǵana elektrondy kezekti paıdalana alady», - dedi J.Ápetova.

Almaty HQO-lary dúısenbi men senbi aralyǵynda, tańǵy saǵat 9.00-den keshki saǵat 20.00-ge deıin jumys isteıdi.