Almatyda HQO qyzmetkeri ózi qutqarǵan jigitti aýrýhanadan shyǵarýǵa bardy
ALMATY. QazAqparat - Káriz qudyǵynda ýlanyp, aman qalǵan «Almaty sý» qyzmetkerleriniń biri aýrýhanadan shyqty, dep habarlaıdy QazAqparat tilshisi.
8 maýsymda Qalqamandaǵy №7 aýrýhanadan 25 jastaǵy Nurjandy shyǵaryp alýǵa HQO qyzmetkeri Erjan Ábdirazaqov ta bardy.
Erjan Ábdirazaqov jansaqtaý bóliminde jatqan jigitterge kirgizbese de, týystary, aýrýhana dárigerleri arqyly naýqastardyń jaǵdaıyn bilip otyrdy. Ajaldan aman qalǵan Nurjan óziniń qutqarýshysy Erjan aǵasyna aǵynan jaryla alǵys aıtty.
«Men ol kúndi ekinshi týǵan kúnim deı alamyn. Ólip, qaıta tirildim. Sol sátte Erjan sııaqty batyl aǵamyz kómekke kelmegende, o dúnıelik bolar edik. Bizge ekinshi ómir syılaǵan aǵama Alla rızashylyǵy úshin shyn júrekten rızashylyǵymdy bildiremin», - dedi Nurjan.
Al, ekinshi jigit – Asqar Qaınazarov áli de aýrýhanada em alyp jatyr. Ol da esin jıǵan, sóıleı alady. Biraq aýrýhanadan shyǵýǵa erte, áli de álsiz. Ony da kórýge Erjan birneshe ret barǵan, biraq palataǵa jibermedi. Sondyqtan onyń baýyry Ysqaq arqyly hal-jaǵdaıyn bilip turady.
«Azamattarymyz aman bolsa eken. Asqardyń da tez aıyǵyp, qatarǵa qosylýyn tileımin. Nurjan aýrýhanadan shyqqanda qatty qýandym. Týystary, áriptesteri kelip, bárimiz birge qýanyp, shyǵaryp aldyq. Endi Asqardy da osylaı qýanyshpen shyǵaryp alaıyq. Bárimiz de onyń densaýlyǵy úshin duǵada otyrmyz», - deıdi Erjan.
Syn saǵatta esh oılanbastan, óz ómiriniń qaýpine qaramaı, qutqarýǵa umtylǵan Erjan Ábdirazaqovtyń isi úlken erlik, asqan adamgershilik.
Eske sala keteıik, osyǵan deıin Almatyda HQO qyzmetikeriniń káriz qudyǵyna túsip, ýlanyp qalǵan eki azamatty qutqarǵanyn jazǵan bolatynbyz.
Kásiporyn osy oqıǵaǵa baılanysty túsinik berdi.
«1 maýsymda «Almaty sý» kásipornynyń qyzmetkerleri kommertsııalyq uıymdardyń sý eseptegish quralyn teksermek bolǵan. Qyzmetkerler qatelesip sýdyń emes, káriz júıesiniń qaqpaǵyn ashyp qaraǵan. Sonyń kesirinen gaz býynan ýlanǵan. Qazir kásiporynda qyzmettik tekserý júrip jatyr. Negizinde «Almaty sý» qyzmetkerleri esepteý quraldarynyń kórsetkishin tirkeýmen ǵana aınalysýy tıis. Qudyqqa túsý olardyń mindetine kirmeıdi», - dep málim etti «Almaty sý» MKK.
Keıin dárigerler 25 jáne 42 jastaǵy eki adam №7 qalalyq aýrýhanaǵa shuǵyl jetkizilgenin habarlady.
Olar kúkirt sýtekti gazynan ýlanǵan. Ortalyq júıke júıesi zaqymdanǵan. Ýytty entsefalopatııa dıagnozy qoıyldy. Ekeýi de komada jasandy tynys alý apparatyna qosylǵan edi.
