Almatyda HQKO-da taǵy bir adam qaıtys boldy
ALMATY. QazAqparat - Almatyda Alataý aýdanyndaǵy Halyqqa qyzmet kórsetý ortalyǵynda (HQKO) 1964 jyly týǵan azamat qaıtys boldy, dep habarlaıdy QazAqparat «Azamattarǵa arnalǵan úkimet» memlekettik korporatsııasy» kommertsııalyq emes aktsıonerlik qoǵamynyń resmı málimetine silteme jasaı otyryp.
«2017 jyldyń 16 qańtarynda Almatydaǵy Alataý HQKO-da 1964 jyly týǵan Jaras Kýntakov esimdi azamat qaıtys boldy. Marqum joldasymen birge HQKO-ǵa «meken jaı boıynsha azamattardy tirkeý» talaby boıynsha saǵat 9:30-da kelgen. Bul ýaqytta atalǵan HQKO-da halyq kóp jınalmaǵan. Ol joldasy qujattardy toltyryp jatqan ýaqytynda elektrondy kezek talonyn almaq bolǵan, alaıda ony alyp úlgermesten 09:42-de ózin nashar sezine bastaǵan. Oǵan HQKO-da kezekshiliktegi dárigerler dereý medıtsınalyq kómek kórsetti. 09:52-de «Jedel járdem» kóligi kelip jetken. Alaıda, dárigerler onyń janyna arasha túse almady», delingen «Azamattarǵa arnalǵan úkimet» memlekettik korporatsııasy» habarlamasynda.
Sonymen qatar, atalǵan korporatsııa sozylmaly syrqaty bar jandarǵa HQKO-ǵa kisi kóp jınalǵan ýaqyttarda barmaýǵa keńes berdi.
Eske sala keteıik, 11 qańtar kúni Almaty oblysy Іle aýdany Ótegen batyr kentindegi HQKO-da Boraldaı aýlynyń turǵyny qaıtys bolǵan.
